2 VAKORINTO 4 - Chasu New Testament 1967

Kubirikira kwa kukuduisha na uguguti

¹ Heicho, twena ii ndima vuntu vwa kuvoneiwa, tetuleghela;

² mira vila vya mpiso vyena soni twavisua; neri tetutonga kwa kiavia neri kusankanya kiteto cha Mrungu na mongo; mira he kufunyirija vila e vya idi tukuvonyesha iti tuna kitea, na izii la ngoro ja vantu lekitutetia vuonwa mozya he Mrungu.

³ Mira kakicha Mburi Yedi yetu yevisike he vareteka.

⁴ Evo hevo murungu wa si ii etuntushe madunganyo a vala vesiitikije; kianga cha Mburi Yedi ya ngazo yakwe Kristo eye fwanyanyi ya Mrungu kisivaangaie.

⁵ Ambu tetukubirikira venye, esire iti Kristo Yesu niye Mfumwa, na iti uswi tu vandima venyu vuntu vwakwe Yesu.

⁶ Ambu Mrungu ula etetie kianga kineangaa kufuma he kija, niye eangaa he ngoro jetu; atuinke kianga cha icha la ngazo ya Mrungu he kizango chakwe Yesu Kristo.

Vusoka vwa Ntume na nzinya ya Mrungu

⁷ Mira tuna ii ndungu he ntanu ja ivumba, nesa nzinya ya ngazo mbahisha ioke yakwe Mrungu, neri isitiwe ni yetu.

⁸ Turishwa vwasi myondo yose, mira tetubandanywa; tutatanya, mira tetutesha ikuji;

⁹ turierieshwa, mira tetushighwa; tuviritwa na aho si, mira teturughunyika.

¹⁰ Misi yose tutika kifwa chakwe Yesu he mwiri, nesa kukalama kwakwe Yesu nakwo kufunyirijwe he miri yetu.

¹¹ Ambu uswi tweho tuinkijwa misi yose, tufwe vuntu vwakwe Yesu, nesa nkalamo yakwe Yesu ifunyirijwe he miri yetu yefikiwa ni kifwa.

¹² Heicho kifwa kihira ndima he uswi, mira he unywi ni nkalamo.

¹³ Mira kwa kuti tuna ngoro ila ila ya mwitikijo; sa vuntu cheandikwe: “Nekiitikije, na he vuntu vwa icho netetie.” Na uswi tuitikija; na heicho tuteta;

¹⁴ twekimanya iti ula emvushije Mfumwa Yesu he vefwie, enetuvusha hata uswi hamwe ne Yesu, na kutuikaja hantu hamwe na unywi.

¹⁵ Ambu vintu vyose ni he vuntu vwenyu; nesa iyo mbonea yekiongejwa mno, kuvika mvera kwa avo vajinki kunete na Mrungu akazwe.

Kuwajwa kwa kamtungo na ngazo ya kae na kae

¹⁶ Heicho tetuleghela; nziaho mntu wetu wa nze esakaa, mira mntu wetu wa ndeni eghoshwa mshaa kila msi.

¹⁷ Ambu mavwasi etu ehayame, e a kamtungo du, eturinganyija ngazo ya kae na kae, yezika kuoka nyingi mno;

¹⁸ tusirerehe vila vyevonwa, mira vila vyesivonwa. Ambu vila vila vyevonwa ni vya kakenda du; mira vila vyesivonwa ni vya kae na kae.