2 VAKORINTO 2 - Chasu New Testament 1967

¹ Mira he ngoro yangu nekirekere huvu, nisireza henyu nevihiwe.

² Ambu mi nekimuvihija, niani eneniizihija mi, esire ula evihijwa nimi?

³ Nami nekimuandikie kiteto icho, nesa aho nekiza nisirevihijwa ni vala evo chekinitara kuizihijwa nivo; nekimuarira vose.

⁴ Ambu he mavwasi mangi na kuluviwa uko he ngoro nekimuandikie kwa masoji mangi; si kuti muvihijwe, esire iti muidime kutwarija lukundo lwangu nena nalwo he unywi sa vuntu e lubahisha.

Kughuhia wa vala vegwie vekichwa mti

⁵ Mira kari hena mntu evihije, tenivihije mi du, esire iti kwa mondo ungi -nesa nisireemewa mno,- emuvihije unywi vose.

⁶ Mntu sa uo machundwe ala einkiwe ni vajinki emfika;

⁷ kangi si huvo du, mntu sa uo keba mumshighie na kumtuja, nesa asiremijwa ni kuvihiwa kwakwe kwekela kiringanyo.

⁸ Heicho nimusembisha, mumkoneshije lukundo lwenyu.

⁹ Ambu neandike huvo vuntu vwa icho, nesa niveiwe kukonesha iti mwaoka varesikia he mburi jose.

¹⁰ Mira kakicha mwekimshighia mntu kintu chochose, nami naremshighie; ambu mi nami nekimshighia mntu kintu chochose, nemshighie vuntu vwenyu, mozya he Kristo,

¹¹ nesa Shetani asiretuzima, ambu tetushighie kumanya madunganyo akwe.

¹² Aho nekinafike Troa vuntu vwa Mburi Yedi yakwe Kristo, nikajuvuiwa luvwi vuntu vwa Mfumwa,

¹³ siizihirwe he ngoro yangu, kila nesimvonie mndughu wangu Tito; mira nikavaaghanya, nikavuka kutonga Makedonia.

¹⁴ Mira Mrungu natogolwe, eye etuinka mng’aro kila igheri he Kristo, na kufunyirija fungo ya kummanya ye kila hantu he ndima yetu.

Mighesho na vuvoti vwa Mburi Yedi

¹⁵ Ambu uswi tu mpupuntiko wakwe Kristo, mozya he Mrungu, he vareteka;

¹⁶ he avo va keri ni fungo ya kifwa, yeete kifwa; he avo va kuvoka ni fungo ya nkalamo, yeete nkalamo. Ni ani ra ekoloke he ivyo?

¹⁷ Ambu uswi si sa vala e vajinki vesaja kiteto cha Mrungu; mira ni sa kwa ngoro yeelile, sa vuntu vyefuma ha Mrungu, mozya he Mrungu, tutetia he Kristo.