2 TIMOTEO 4 - Chasu New Testament 1967

¹ Nikukokontia mozya he Mrungu na mozya he Kristo Yesu, enerevalaha vala vereho na vala vefwie, na he kufununkurwa kwakwe na he vufumwa vwakwe;

² birikira kiteto ngwa, ukuringanye igheri leve na igheri lesive, kalelia, bohia, na kuchunda he kugumirija kwose na kucheja.

³ Ambu heneza igheri venesua michejire ya nkalamo; mira kwa kuratera miendire yavo venekuendia vacheji marimbi marimbi, kila veenda vyeizihija masikio avo;

⁴ navo venekuvusha vasisikie vila e vya idi, na kugharukia simo ja mongo.

⁵ Mira we ukete kiringanyo he vintu vyose, gumirija vivivi, ronga ndima ya m’birikiji wa Mburi Yedi, kolosha ndima yako.

⁶ Ambu mi iki niitwa, na igheri la kufwa kwangu lafika.

⁷ Naomana nkondo yedi, nakenja ntambo, mwitikijo neurindie;

⁸ nyuma ya ivyo nevikiiwe ngoki ya singisirya, eyo Mfumwa mrelaha mwenye singisirya eneiniinka msi ula; neri esimi du, mira na vantu vose pere vekunda kufunukurwa kwakwe.

Vumondo vwakwe na kuaghanya

⁹ Kudindije kuza hangu fia.

¹⁰ Ambu Dema anishigha, ekikunda si ii ya iki, akazoka kutonga Tesalonike; Kreske atonga Galatia, Tito atonga Dalimatia.

¹¹ Ewaha nire Luka mwenye hamwe nami. Mghuhe Marko uze hamwe naye, ambu eniveia he ndima.

¹² Mira Tikiko nemtumie uko Efeso.

¹³ Lila ijoho nelishighie hakwe Karpo uko Troa, wekiza uliete, uete na vila vitabu, kukela vila vya mikota.

¹⁴ Aleksanda, mreshana ng’andu evonyeshe vuvivi vujinki hemi; Mfumwa enemriha kiringanyo cha mihiro yakwe.

¹⁵ Nawe ukucheie heye, ambu ekindie mno viteto vyetu.

¹⁶ He masa angu a kuvoka, tehena mntu eimuke mondo wa hangu, mira vose venishighie; niomba vasitarirwe iyo nzune.

¹⁷ Mira Mfumwa wangu ekiimuke hamwe nami akanidindija, nesa he ndima yangu vula vumondo vuamberijwe chekoloke, mhaka Vakiisanga vose vasikie; nami nikakijwa he momo wa simba.

¹⁸ Mfumwa enenikija he kila mburi mbivi, na kunirinda mhaka nifike he vufumwa vwakwe vwa uko wanga. Ngazo ni yakwe kae na kae. Amen.

¹⁹ Nikezijija Priska ne Akila, na vala va he nyumba yakwe Onesiforo.

²⁰ Erasto aikaa uko Korinto; Trofimo nemshighie uko Mileto, ni muwaji.

²¹ Kudindie kuza igheri la kiho lesinafika. Eubulo ekukezya ne Pude, ne Lino, ne Klaudia, na vandughu vose.

²² Mfumwa aikae hamwezu na mpeho wako. Mbonea na iikae hamwe na unywi.