2 TIMOTEO 2 - Chasu New Testament 1967

¹ Nawe mwanangu, ukete lungufyo hena mbonea yeho he Kristo Yesu.

² Na jila mburi wejisikie hemi mozya ya vaonwa vajinki, ijo uvainke vantu verinda kitengo veidima kuvacheja vangi.

³ Ule vwasi hamwe nami, sa msikari wedi wakwe Kristo Yesu.

⁴ Tehena eomana nkondo ekugera he mabinuko a si ii iti amwizihije ula emwandike vusikari.

⁵ Hata mntu ekivotana he mishenjigho, tekadokwe ngoki ekisavotana vuntu chetara.

⁶ Kimtara mwimi ula elie vwasi he ndima aoke wa kuvoka he kuvona ifungu la ntunda.

⁷ Twarija nezo ivyo nekuvwira, ambu Mfumwa enekunka icha he vyose.

⁸ Mkumbuke Yesu Kristo evukie he vefwie, wa lukolo lwakwe Davidi, sa vuntu Mburi Yedi yangu yeteta.

⁹ Nami heyo nerishijwe vwasi na kuchungwa sa mrehira vivivi; mira kiteto cha Mrungu tekichungwa.

¹⁰ Heicho nigumirija vyose vuntu vwa vala vesaghurwe, nesa navo vavone lukio lula lweho he Kristo Yesu, hamwe na ngazo ya kae na kae.

¹¹ Ni mburi ya kuitikijwa, ambu: “Kakicha twekifwa hamwe naye, tunekalama hamwe naye;

¹² Kakicha twekigumirija tunetetia hamwe naye; Kakicha twekimkana ye, naye enetukana;

¹³ Kakicha uswi tetuitikija, ye erinda kitengo genda, Ambu teidima kukukana mwenye.”

Machundwe he mburi ja kukanana

¹⁴ Uvakumbushe ivyo, wekivachunda mozya he Mrungu, vasioke venye viteto vya nkani vyesina lumazo, esire kukonda vala vevisikia.

¹⁵ Ukudindije kukuvonyesha iti wekundiwe ni Mrungu, mndima esina cho chemsonisha, eringanya nezo kiteto cha idi.

¹⁶ Tesia viteto vyesina nzia, esi vya mitasire yetu; ambu venezika kuratera vuvivi,

¹⁷ na viteto vyavo vinegisha sa kionda cha shondo. Ghati hevo hemna Himenayo ne Fileto,

¹⁸ vesovie ila idi, vekiti kuvuka kwa vefwie kwakenja kuza; huvo vegharushe mwitikijo wa va kumwe.

¹⁹ Mira Msingi wa Mrungu wedindie weimuke, una kisimbiko iki: Mfumwa emanyije vala e vakwe. Kangi: “Kila elanga izina la Mfumwa nashighe vuvivi.”

²⁰ He nyumba mbaha ntanu jose si ja dhahabu na fedha du, mira hena ja miti na ja ivumba, jingi jina shima, jingi tejina.

²¹ Kakicha mntu ekuzerija he kutana navo, eneoka ntanu yena shima, yeojijwe, yyemwizihija Mfumwa, yeharehwe he kila ndima yedi.

²² Mira tama ja kibwange ujiahe; uratere kitea, na mwitikijo na lukundo, na mporere, hamwe na vala vemwitanga Mfumwa kwa ngoro yeelile.

²³ Mira usue mavwijo a vurundu esina icha, wekimanya iti emogha mavoo.

²⁴ Kangi tekimtara mndima wa Mfumwa kuketa mavoo, mira aoke mhoo he vantu vose, eidima kucheja, mragumurija;

²⁵ ekivachunda na vuhoo vala vekanana naye, nesa kakicha kive Mrungu avainke kuchwa mti, na kumanya idi;

²⁶ vaidime kutwarija wa na kufuma he kitende chakwe Shetani, evo veteghiwe niye, na kuronga vila ekunda.