2 PETRO 1 - Chasu New Testament 1967

Ngezya

¹ Simoni Petro, mzoro na ntume wakwe Yesu Kristo, Ha vala veinkiwe mwitikijo mmwe na uswi, wena zora mbaha, he singisirya ya Mrungu wetu, na Mkija Yesu Kristo.

² Mbonea na mporere naviongejwe henyu he kummanya Mrungu ne Yesu Mfumwa wetu.

Lumazo na miikarire ya Kikristo

³ Ambu nzinya jakwe ja Kimrungu jetuinkie vintu vyose vyetara nkalamo na kuzera, he kummanya ye etuitange he ngazo yakwe na vwedi vwakwe mwenye.

⁴ Kangi he vintu ivyo etuinkie viravo vibahisha, vya zora mbaha, nesa hevyo muveiwe kuoka vasanga va kiikarire cha Kimrungu, mwekikijwa he kukondika kweho aha he ili isanga vuntu vwa viherehere.

⁵ Heicho mondo wa henyu kudokeni mno, na he mwitikijo wenyu ketani vwedi, he vwedi ketani kumanya.

⁶ he kumanya ketani kiringanyo, he kiringanyo ketani kugumirija, na he kugumirija, kuzera,

⁷ na he kuzera, lukundo lwa kindughu, na he lukundo lwa kindughu, kukundana.

⁸ Ambu ivyo vyose veyekiikaa henyu na kuizua fwa, vimuosha unywi iti temu vadai neri vantu vesina ntunda, he kummanya Mfumwa wetu Yesu Kristo.

⁹ Mira ula esova ivyo ni ituntu, teidima kuvona vintu vyeho hae, aivaa kula kuzerijwa mabanu akwe a uko kae.

¹⁰ Heicho vandughu kudokeni mno he kudindija mwitango na msaghuro wenyu; ambu mwekironga ivyo temukakwangwale neri.

¹¹ Huvo muneorwa kuingia he vufumwa vwa kae na kae vwa Mfumwa na Mkija wetu Yesu Kristo.

Petro e hafuhi na kufwa

¹² Heicho nikuringanya kumukumbusha ivyo misi yose, nziaho mwevimanyije na kukoneshwa he idi mwena nayo.

¹³ Nami nivona iti kutara aho necheri aha iki kikalo, nimuavijishe kwa kumukumbusha.

¹⁴ Nekimanya iti ukwo kukuhambua kikalo changu kwazengelela sa vuntu Mfumwa wetu Yesu Kristo enivonyeshe.

¹⁵ Mira ninekudindija, nesa marongo ose aho nanafwa munakumbuke ijo mburi.

Vuonwa vwakwe Petro na vula vwa Varoti

¹⁶ Ambu aho twekimumanyisha unywi nzinya ja Mfumwa wetu Yesu Kristo na kuza kwakwe, teturatere simo jeukiwe kwa icha, mira uswi venye twekivonie venye vubaha vwakwe.

¹⁷ Ambu einkiwe shima na ngazo ni Mrungu Vava, aho ekietiwe izii lefuma he ngazo mbahisha: “Uu ni Mwanangu mkunde wangu, nemwizihirwe.”

¹⁸ Ilo izii uswi twelisikie lekifuma uko wanga, aho twena naye he ila ntuvi yezerire.

¹⁹ Na uswi tuna kila kiteto cha vuroti chedindie kukela, echo mwekikirereha sa taa yeaka hantu hena kija, muronga chedi, mhaka hekineshangalala, na ngalakere yekikwea he ngoro jenyu.

²⁰ Murongemanya iti, tehena vuroti he maandiko, vwegharushwe he kikundire cha mntu msiku.

²¹ Ambu narini vuroti tevuetiwe kwa kikundire cha mntu; mira vantu vezerire vetetie vyefuma ha Mrungu vekitonjwa ni Mpeho Wedi.