1 YOHANE 5 - Chasu New Testament 1967

Mwitikijo wa Kikristo

¹ Kila eitikija iti Yesu ni Kristo, emoghiwe ni Mrungu. Na kila emkunda ula emmogha, erekunda hata ula emoghiwe niye.

² Heicho tumanya iti twevakundie vana va Mrungu, aho twekimkunda Mrungu na kugurisha maazero akwe.

³ Ambu ukwo nikwo kumkunda Mrungu, kugurisha maazero akwe, kangi maazero akwe si mazinya.

⁴ Ambu chose chemoghiwe ni Mrungu kivota si ii; kangi kuvota kwevotie ii si ni mwitikijo wetu.

⁵ Enevota si ii ni ani, esire ula eitikija kuti Yesu ni Mwana wa Mrungu?

⁶ Uu niye ezie he mpombe na sakame, Yesu Kristo; si he mpombe du, mira he mpombe na sakame.

⁷ Na Mpeho niye eteta vuonwa, ambu Mpeho niye idi.

⁸ Ambu hena vatatu veteta vuonwa: Mpeho, mpombe na sakame; ava vose vatatu vesikijanya he mburi mwe.

⁹ Twekighuhia vuonwa vwa vantu, vuonwa vwa Mrungu ni vubaha kukela; ambu vuonwa vwa Mrungu ni uvu, iti emtetiit Mwanawe vuonwa.

¹⁰ Ula emwitikija Mwana wa Mrungu ena uvu vuonwa heye. Ula esimwitikija Mrungu, emghosha mmongo, kila esiitikija uvwo vuonwa evwo Mrungu emkoneshije Mwanawe.

¹¹ Uvu nivwo vuonwa, iti Mrungu etuinkie nkalamo ya kae na kae; na iyo nkalamo iho he Mwanawe.

¹² Ula emna Mwana, ena na iyo nkalamo; ula esina uo Mwana wa Mrungu tena iyo nkalamo.

Msirikijo

¹³ Nemuandikie unywi ivyo, nesa mumanye iti muna nkalamo ya kae na kae, unywi mweitikija Izina la Mwana wa Mrungu.

¹⁴ Na ii niyo ndekero twena nayo heye, iti twekiomba kintu cheringane na kukindire chakwe, etusikia.

¹⁵ Kakicha twekimanya iti etusikia, chose tweomba, tumanye iti tuna vila tweombie hakwe.

¹⁶ Mntu ekimvona mndughu wakwe ekironga ibanu esi la kifwa, amwombie, huvo enemunka nkalamo he vuntu vwa vala verongie mabanu esi a kifwa. Hena ibanu la kifwa. Siteta iti eneomba vuntu vwa ilo.

¹⁷ Cho esi cha kitea ni ibanu, kangi hena ibanu esi la kifwa.

¹⁸ Twemanyije iti ula emoghiwe ni Mrungu tebana; mira emoghiwe ni Mrungu ekurinda, neri ula mvivi temkunta.

¹⁹ Twemanyije iti uswi tu va Mrungu, na iti si ii yose chwe iikaa he ula mvivi.

²⁰ Na uswi twemanyije kuti Mwana wa Mrungu akenja kuza, naye etuinkie icha kuti tummanye ula e wa idi, na uswi tuho he ula e wa idi, nicho kuti he Yesu Kristo Mwana wakwe. Uu niye Mrungu wa idi, na nkalamo ya kae na kae.

²¹ Vana vadori, kurindeni venye he mirungu.