1 YOHANE 4 - Chasu New Testament 1967

Kugheshwa ngoro

¹ Vakunde, musiitikije kila mpeho, mira jighesheni ijo mpeho iti jifuma he Mrungu; amb varoti vanjiki va mongo vavoneka he ii si.

² Cha kumanyika Mpeho wa Mrungu ni iki: Kila mpeho ezumira iti Yesu Kristo ezie he mwiri efuma he Mrungu.

³ Na kila mpeho esimzumira Yesu tefuma he Mrungu. Uo niye mpeho wa ula Mkinda Kristo eye mwemsikie iti eza; na iki ewaha he ii si.

⁴ Unywi, vana vadori, mwefumie he Mrungu, na unywi mwavavota, ambu ula mwena naye ni m’baha kumvecha ula e wa ii si.

⁵ Vo ni va ii si, nicho veteta vya ii si, nayo ivasikia.

⁶ Uswi tufuma he Mrungu. Ula emmanyije Mrungu etusikia; ula esi wa Mrungu tetusikia. Heicho tumanya mpeho wa idi na mpeho wa mongo.

Lukundo lwa Mrungu na lukundo lwa mntu

⁷ Vakunde, tukundaneni; ambu lukundo ni lwa Mrungu, na kila ekunda emoghiwe ni Mrungu, kangi emmanyije Mrungu.

⁸ Ula esikunda temmanyije Mrungu ambu Mrungu ni lukundo.

⁹ Aho niho lukundo lwa Mrungu lwevoneke hetu, iti Mrungu emtumie Mwanawe eremmwe aha si, nesa tuvonie nkalamo heye.

¹⁰ Ulu nilwo lukundo, si iti uswi twekikundie Mrungu, mira ye erongetukunda uswi, akamtuma Mwana wakwe nesa aoke mzakundanya vuntu vwa mabanu etu.

¹¹ Vakunde, kila Mrungu etukundie huvo, chetuvaie na uswi kukundana.

¹² Tehena mntu anamvona Mrungu narini. Twekikundana, Mrungu eikaa he uswi, kangi lukundo lwakwe lwakoloka he uswi.

¹³ Aho tumanya iti tuikaa heye, naye he uswi, ambu etuinkie Mpeho wakwe.

¹⁴ Na uswi twevonie na kuteta vuonwa iti Vava emtumie Mwana aoke Mkija wa si ii.

¹⁵ Ula ezumira iti Yesu ni Mwana wa Mrungu, Mrungu eikaa heye, naye he Mrungu.

¹⁶ Na uswi twamanya lukundo Mrungu ena nalwo he uswi, na kuluitikija. Mrungu ni lukundo, ula eikaa he lukundo eikaa he Mrungu, Mrungu naye eikaa heye.

¹⁷ Vuntu vwa icho, lukundo lwakoloshwa hetu, nesa tukete ndekero he msi wa mlaho; ambu sa vuntu ye eikee, na uswi nirehuvo vuntu tweikee he si ii.

¹⁸ He lukundo tehena fole; mira lukundo lwekoloke lutagha fole na nze, ambu fole irisha vwasi; ula ena fole tenakoloshwa he lukundo.

¹⁹ Uswi tukunda ni hala ye erongetukunda uswi aho kuvoka.

²⁰ Mntu ekiti: Nemkundie Mrungu, uko emvihiwe mndughu wakwe, ni mmongo, ambu ekisamkunda mndughu wakwe emvona, teveiwa kumkunda Mrungu esinamvona.

²¹ Na ili iazero tweliinkiwe niye iti ye emkunda Mrungu amkunde na mndughu wakwe.