1 YOHANE 3 - Chasu New Testament 1967

Lukundo lwakwe Vava lutonja miikarire mishaa

¹ Rerehani, ni lukundo lweringane ze etuinkie, iti tuitangwe vana va Mrungu; na uswi nivwo vuntu tweikee. Heicho ii si teitumanya, kila yesekimmanyije ye.

² Vakunde, iki tu vana va Mrungu neri tekinafunyirijwa nezo vuntu twenereoka; mira twemanyije iti aho ekinezafunyirijwa tunefwanana naye; ambu tunemvona vuntu efwanane.

³ Na kila mntu ena ilo ikuji heye ekuelija, sa vuntu ye eelile.

Mabanu ni mtekano na vuvwana vwa Mrungu

⁴ Ula eronga mabanu eketa lubero; ambu mabanu nio lubero.

⁵ Ambu mwemwnyije iti efunyirijwe nesa avushe mabanu; neri mabanu teeho heye.

⁶ Ula eikaa heye teronga mabanu; kangi ula eronga mabanu tenamvona neri temmanyije.

⁷ Vana vadori, mntu asizemuisha, ye eronga kitea ena kitea, sa vuntu ye ena kitea;

⁸ ula eronga mabanu efuma hakwe Shetani; ambu Shetani ni mzaronga mabanu too kuvoka. He vuntu vwa icho, Mwana wa Mrungu efunyirijwe, nesa akonde ndima jakwe Shetani.

⁹ Kila mntu emoghiwe ni Mrungu teronga mabanu, ambu mbeu yakwe iho heye; neri teidima kuronga mabanu, kila emoghiwe ni Mrungu.

¹⁰ Heicho vana va Mrungu vevoneka, hata vana vakwe Shetani. Kila mntu esiketa kitea, tefumie he Mrungu; neri ula esimkunda mndughu wakwe.

¹¹ Ambu ii niyo ila mburi mweisikie too aho kuvoka, iti tukundane uswi venye na venye;

¹² si sa vuntu Kaini eokie wa ula mvivi, akamkoma mndughu wakwe. Naye emkomiie ni? Ambu mihiro yakwe neki mivivi, na ila ya mndughu wakwe neki ya kitea.

Lukundo lwa kindughu

¹³ Vandughu vangu, musizemaka, ii si yekimuvihiwa.

¹⁴ Uswi twemanyije iti twavecha kufuma he kifwa tukaingia he nkalamo, kila twevakunda vandughu. Ula esikunda eikaa he kifwa.

¹⁵ Ula emvihiwa mndughu wakwe ni mkomi; na unywi mwemanyije iti mkomi tena nkalamo ya kae na kae yeikaa heye.

¹⁶ Heicho twamanya lukundo, kila ye einkije kuho kwakwe vuntu vwetu; kitutara na uswi kuinkija moo wetu vuntu vwa vandughu.

¹⁷ Mira mntu ena mari ja si ii ekimvona mndughu wakwe e msovu, ekikinda mbonea yakwe heye, huvo lukundo lwa Mrungu luikaa ze heye?

¹⁸ Vana vadori, tusikunde kwa viteto, kana kwa lumi, mira kwa mihiro na idi.

¹⁹ Heicho tumanyika iti tu va idi, na uswi tutundanya ngoro jetu mozya heye,

²⁰ kakicha ngoro jetu jitulaha; ambu Mrungu ni m’baha kuvecha ngoro jetu, naye ejimanyije jose.

²¹ Vakunde, ngoro jetu jekisatulaha, tuna ndekero he Mrungu;

²² chose tweomba, tukiinkwa niye, kilaa twegura maazero akwe, na kuronga vila vyemwizihira.

²³ Na iazero lakwe ni iti tuitikije izina la Mwana wakwe Yesu Kristo na kukunda uswi venye na venye, sa vuntu etuazere.

²⁴ Ula egura maazero akwe eikaa heye, naye heye. Heicho tumanya iti eikaa he uswi, kwa uo Mpeho emtuinkie.