1 YOHANE 2 - Chasu New Testament 1967

¹ Vandughu vadori, nimuandikia ivi nesa musironge mabanu. Na kakicha hena aronga mabanu, tuna mzetusembia he Vava, Yesu Kristo mwenye kitea,

² naye ni mrakundanya he mabanu etu; kangi si he mabanu etu du, mira hata mabanu a si jose.

Kusikia kukonesha vumwe

³ Na heicho tumanya iti twemmanyije ye, kakicha tugurisha maazero akwe.

⁴ Ula eti emmanyije, mira tegurisha maazero akwe, ni mmongo, neri idi teiho heye.

⁵ Mira ula egurisha kiteto chakwe, he uo lukundo lwa Mrungu lwekoloke kididi. Huvo tumanya iti tuho heye.

⁶ Ula eti eikaa heye, kimtara kutonga sa vuntu ye mwenye ekitonga.

⁷ Vakunde, simuandikia iazero ishaa, esire lila iazero la kae mwekina nalo too kivoko, na ilo iazero la kae ni kila kiteto mwekisikie.

⁸ Kangi nimuandikia iazero ishaa, kiteto cha idi heye na he unywi; iti kija kivecha na kianga cha idi chekenja kuangaa.

⁹ Ula eti eho he kianga mira emvihiwa mndughu wakwee, erecheri he kija iki.

¹⁰ Ula emkundie mndughu wakwe, eikaa he kianga, neri heye tehena chehosha.

¹¹ Mira ye emvihiwa mndughu wakwe, eho he kija; kangi etongia he kija, neri temanyije hantu etonga naho, ambu kija chamwuututusha.

¹² Nimuandikia unywi, vana vadori, kila mwadhighiwa mabanu enyu, vuntu vwa izina lakwe.

¹³ Nimuandikia unywi, vavava, ni hala mwammanya ula eho too kuvoka. Nimuandikia unywi, vairika, ambu mwamvota ula mvivi. Nimuandikia unywi, vavava, ambu mwammanya Vava.

¹⁴ Nemuandikie unywi, vavava, ambu mwammanya ula eho too kuvoka. Nemuandikie unywi, vairika, kila mwena nzinya, na kiteto cha Mrungu kiikaa he unywi, na unywi mwamvota ula mvivi.

¹⁵ Musikunde ii si, neri vila veho he ii si. Mntu ekikunda ii si, kumkunda Vava tekuho heye.

¹⁶ Ambu chose cheho he ii si, echo: kiherehere cha mwiri, na kiherehere cha meso, na vila vyekubaiwa he moo uu, tevifuma ha Vava, mira vifuma he ii si.

¹⁷ Na ii si ivecha hamwe na viherehere vyavo; mira ula eronga kikundire cha Mrungu eikaa kae na kae.

Machundwe vuntu vwa vala vemkinda Kristo

¹⁸ Vana, saa ya msirikijo yafika; ni sa vuntu mwesikie iti Mkinda Kristo eza, hata iki vakinda Kristo vakenja kuza. Heicho tumanya iti ni saa ya msirikijo.

¹⁹ Vefumie hetu, mira seki va hetu. Ambu nanga neki va hetu, vekiikaa na uswi. Mira vefumie nesa vafunukurwe iti si vose e va hetu.

²⁰ Na unywi mwevirirwe mafuta ni Ula Ezerire, na unywi mwemmanyije vose.

²¹ Simuandikie unywi, iti temumanyije idi, mira iti mweimanyije, na iti tehena mongo wo wose wefuma he idi.

²² Mmongo ni ani, si ula ekana iti Yesu si Kristo? Ula ye emkana Vava na Mwana, uo niye Mkinda Kristo.

²³ Ula emkana Mwana temna Vava; ula emzumira Mwana, emnaa hata Vava.

²⁴ Iki na unywi, icho mwekisikie too kuvoka na kiikae he unywi, na unywi muneikaa he Mwana, na he Vava.

²⁵ Na kiravo etuvikie nicho iki: Nkalamo ya kae na kae.

²⁶ Nemuandikie ivyo vuntu vwa vala veenda kumutesha.

²⁷ Na unywi mafuta ala mweinkiwe niye eikaa he unywi, neri temuenda mntu emucheja; mira sa vuntu ala mafuta akwe emucheja mburi jose, kangi ni idi neri so mongo, na sa vuntu emucheja, ikaani heye.

²⁸ Iki ra vana vadori, ikaani heye, nesa aho ekifunukurwa tukete ndekero, neri tusisonike mozya heye he kuza kwakwe.

²⁹ Mwekimanya iti ye ni Mkitea, manyeni ra iti ula eronga kitea emoghiwe niye.