1 YOHANE 1 - Chasu New Testament 1967

Nkalamo ya kae na kae yefunyirijwe ni Yesu

¹ Kila chekiho too kuvoka, twekisikie, twekivonie na meso etu, twekirerehe, kangi mikono yetu ikakibabata, iyo mburi ya kiteto cha nkalamo;

² -kangi iyo nkalamo yekivoneke na uswi tweivonie, kangi tuitetia vuonwa kwa kumubirikira unywi iyo nkalamo ya kae na kae, yekiho he Vava, ikavoneka;-

³ kila twekivonie na kukisikia, tumuburikira na unywi, nesa na unywi mukete vumwe na uswi; na uvwo vumwe vwetu ni hamwe ne Vava, kangi hamwe ne Yesu Kristo Mwana wakwe.

⁴ Na ivi tuviandika, nesa kuizihirwa kwetu kukoloshwe.

Kuketa vumwe na Mrungu ni kushigha mabanu

⁵ Ii niyo mburi twekiisikie hakwe, na kuibirikira henyu, iti: “Mrungu ni kianga, neri kija tekiikaa heye.”

⁶ Twekiti iti tuna vumwe naye kangi twekianga he kija, twateta mongo, neri teturonga kila e cha idi;

⁷ mira twekitongia he kianga, sa vuntu ye eho he kianga, tuna vumwe uswi venye na venye, na sakame yakwe Yesu Mwana wakwe, ituelija mabanu ose.

⁸ Twekiti tetuna mabanu, tukuisha venye, neri idi teiho hetu.

⁹ Twekighamba mabanu etu, ye ni mkitengo na mkitea, etushighia mabanu etu, na kutuoja vivivi vyose.

¹⁰ Twekiti iti tetubanie, tumghosha mmongo, neri kiteto chakwe tekiho he uswi.