1 VAKORINTO 9 - Chasu New Testament 1967

Ntume ni mfwanano wa vila erongie

¹ Hamao, mi sikombolwe? mi si ntume? mi simvonie Yesu Mfumwa wetu? unywi te mu ndima yangu he Mfumwa?

² Kakicha mi si ntume he vangi, mira he unywi mi ni ntume; ambu ni unywi kisimbiko cha vuntume vwangu he Mfumwa.

³ Icho nicho kigharusho changu he vala venivwija.

⁴ Hama tetuidima kula na kunwa?

⁵ Tetuidima kughuha mche e mndughu sa vuntu ntume jingi na vajinawe Mfumwwa Kefa veketie?

⁶ Kana niremi du ne Barnaba twesiidima kushigha ndima?

⁷ Ni msikari ani etonga nkondo na ntanu jayo? Kana niani erisha ifio esinwa mavee a ilo ifio?

⁸ Hama, niteta ivyo kimtu? kana, myomongwa teiteta huvo?

⁹ Ambu he myomongwa yakwe Mose heandikwe: “Ng’ombe yekivata ngano iti ijishunte usiichunge momo.” Hamao, aho Mrungu erereha mburi ya njekwana?

¹⁰ Kana eteta huvo vuntu vwetu? Yee, vyeandikwe vuntu vwetu; ambu mwimi kitara aime na ikuji, mreshunta ngano kimtara aarire kuinkwa ifungu lakwe.

¹¹ Ukinakiche uswi twemuhandiie vintu vya kimpeho, hama ni kizinya ani twekifindika vintu vyenyu vya kimwiri?

¹² Ukinakiche vangi vena sanga na miidimire ii he unywi, uswi tetukelile? Mira uswi teturatere icho chetara, esire tugumirija vintu vyose, nesa tusirekindija Mburi Yedi yakwe Kristo.

¹³ Temumanyije iti vala veronga ndima he nyumba ya mtaso vela vya nyumba ya mtaso, na vala veronga ndima he meza ya mtaso vela ifungu he meza ya mtaso?

¹⁴ Nirehuvo hata Mfumwa eazere iti vala vebirikira Mburi Yedi vaighushwe ni iyo Mburi Yedi.

¹⁵ Mira mi siketie huvo neri he kintu kimwe, neri siandika iti kioke huvo hemi; ambu hemi keba nifwe kukela mntu ekihayamija uku kukukaza kwangu.

¹⁶ Ambu nziaho nibirikira Mburi Yedi sina cha kukukaza, ambu netekundiwa, kangi, vwasi vwangu nekisabirikira Mburi Yedi!

¹⁷ Ambu nekironga ii ndima kwa kukkunda kwangu sina kitumulilo, mira kari si kwa kukunda, nevikiwe usungaji.

¹⁸ Iki kitumulilo changu nini? Ni iki, iti nekibirikira, nibirikire Mburi Yedi chesina mariho, na kusaghuha vila vyekundijwa ni Mburi Yedi.

Miendire yakwe he kuvaghosha vantu Vakristo

¹⁹ Ambu nziaho ni nkombolwa he vantu vose mira nekughoshije mzoro wa vose, nesa nimaze vantu vajinki kukela.

²⁰ He Vayuda neokie Myuda, nesa nimaze Vayuda; he vala veho kijusi he viziomo, neokie sa neho kijusi he viziomo, nziaho mi mwenye siho kijusi ya viziomo, nesa nimaze vala veho kijusi ya viziomo.

²¹ He vala vesina viziomo, neokie sa nesina viziomo, si iti sina viziomo mozya he Mrungu, mira nina viziomo mozya he Kristo, nesa nivamaze vala vesina viziomo.

²² He vasoka neokie msoka, nesa nivamaze vasoka. Nekuringanye he vintu vyose he vantu vose, nesa he nzia jose niidime kukija vantu.

²³ Ivi vyose nivironga vuntu vwa Mburi Yedi, nesa nighaviwe chedi chayo.

Kukudindija kwetara he kuzima

²⁴ Kana temumanyije iti vala vechwa makero vedindika vose, mira einkwa kitumulilo ni mmwe? Na unywi dindikani huvo nesa muinkwe.

²⁵ Na kila mntu ekanania ekuima vyose; heicho vo veketa huvo nesa vainkwe ngoki yekondika, mira uswi tuinkwe ngoki yesikondika.

²⁶ Nami niradindika huvo huvo, si sa mntu esimanyije cho edindikia; niomana, si sa mntu ebigha nkungu;

²⁷ mira nirisha mwiri wangu vwasi na kuubinusha, nesa nekivabirikira vangi, mi mwenye nisioke mntu esuwa.