1 VAKORINTO 7 - Chasu New Testament 1967

Vwasi vwa unyumba, vugharo na kushighana

¹ Heicho, he mburi jila mweniandikie, ni chedi mntu wa kiume asikunte mntu wa kiche.

² Mira he vuntu vwa kushinda, kila mntu wa kiume nakete mche wakwe mwenye, na kila mntu wa kiche akete mme wakwe mwenye.

³ Mme amunke mche wakwe kila chemtara, nirehuvo, na mche naye amunke mme wakwe kila chemtara.

⁴ Mche teidima kutetia mwiri wakwe ye mwenye, esire mme wakwe; nirehuvo, mme teidima kutetia mwiri wakwe mwenye, esire mche wakwe.

⁵ Musiimane, esire mwekiteaghana igheri, nesa muvone kapengere ka kuombia, munaziane wa, nesa Shetani asimugheshe, kwa kusaketa kiringanyo kwenyu.

⁶ Mira niteta huvo kwa mburi yangu mwenye, si iamoro.

⁷ Mira cho nekunda ni iti vantu vose vaikae sa vuntu mi neikee; mira kila mntu ena kiinkwa chakwe mwenye chefuma ha Mrungu, uu kivungi na uu kivungi.

⁸ Mira nivavwira vala vesinaghuhana, na vala vefwiiwe ni vome iti ni keba vaikae sami.

⁹ Mira kakicha teveidima kukukinda, navaghuhane; ambu ni keba kughuhana kukela kumotoka.

¹⁰ Mira vala veghuhane nivaazera; neri si mi mira ni Mfumwa; mche asitane na mghosiwe;

¹¹ kakicha etana naye aikae asireghuhwe, kana ahundukiane na mghosiwe; kangi mme asimshighe mche wakwe.

¹² Mira vala vangi nivavwira mi, si Mfumwa; iti kakicha hena mndughu ena mche esiitikije, na uo mche ekunda kuikaa naye, asimshighe;

¹³ na mche ena mme asiitikije, na uo mme ekunda kuikaa naye, asimshighe mghosiwe.

¹⁴ Ambu mme esiitikije ezerijwa he mche wakwe; na mche esiitikije ezerijwa he mme wakwe; nanga seki huvo vana venyu vesekizerire, mira iki vezerire.

¹⁵ Mira ula esiitikije ekighotoka, naghotoke! Aho mndughu wa kiume kana wa kiche tena cho chemchunga. Mira Mrungu etuitangie mporere.

¹⁶ Ambu, we mche, umanya ze iti unemkija mghosio? kana we mme, umanya ze iti unemkija mche wako?

¹⁷ Mira sa vuntu Mfumwa emghavie kila mntu, na vuntu Mrungu emwitange kila mntu, naretonga huvo. Nivwo vuntu neazera he makanisa ose.

¹⁸ Kakicha mntu eitangwe anatavanwa, asikughoshe sa esitavanwe. Mntu msiku eitangwe esinatavanwa, asitavanwe.

¹⁹ Kutavanwa si kintu, na kusatavanwa si kintu; esire kugurisha maazero a Mrungu.

²⁰ Kila mntu aikae sa vuntu eikee hala ekiitangwa.

²¹ Kakicha weitangwe we mzoro, usidunkunyike, mira wekiidima kukukombola, ukukombole.

²² Ambu ula eitangwe he Mfumwa e mzoro ni nkombolwa wa Mfumwa. Nirehuvo na ula eitangwe e nkombolwa, ni mzoro wakwe Kristo.

²³ Mwezorirwe na zora mbaha; musioke vazoro va mntu.

²⁴ Vandughu vangu, kila mntu aikae mozya he Mrungu vuntu eikee hala ekiitangwa.

²⁵ He mburi ya vabora, sina iazero la Mfumwa; mira niteta mivonire yangu, vuntu nefwiiwe mbonea ni Mfumwa kuoka mkitengo.

²⁶ Heicho niti si chedi, vuntu vwa vwasi vwewaha, ni chedi mntu aikae vuntu eikee.

²⁷ Kakicha wechunganywe na mche, usiende kuchunguiwa. Kakicha wechunguwe he mche, usiende mche.

²⁸ Mira kakicha waghuha, tuna nzune, na m’bora ekighuhwa tena nzune; mira vantu avo venevona mavwasi he mwiri, nami nienda kuvakania he ivyo.

²⁹ Mira vandughu, niti huvu, igheri leshele si ieza; kuvokia iki vala vena vache vaikae sa vesina;

³⁰ na vala veia sa vesiia, vala veizihirwa sa vesiizihirwa, vala vezora sa vesina kintu.

³¹ Na vala velia ii si, sa vesiilia mno, ambu vintu vya si ii vivecha.

³² Mira nienda iti musile vwasi. Ula esighuhie ekubinusha na mburi ja Mfumwa, vuntu enemwizihija Mfumwa;

³³ ula eghuhie ekubinusha na mburi ja ii si, vuntu enemwizihija mche wakwe.

³⁴ Kangi mche na m’bora vetekane. Ula esighuhiwe ekubinusha na mburi ja Mfumwa, nesa aoke ezerire he mwiri na ngoro. Mira ula eghuhiwe, ekubinusha na mburi ja ii si, vuntu enemwizihija mghosiwe.

³⁵ Niteta ivyo nesa nimumazie; si iti nimuvikie kitende, esire iti ni vuntu vwa vila vyeizihija, kangi iti muidime kumrongia Mfumwa ndima, mwesijutwa ni vintu vingi.

³⁶ Mira kakicha hena mntu evona iti temrongia mwana wakwe wa kibora chedi, naye akenja kuvecha vwedi vwa vubora vwakwe, naye eenda, naronge sa vuntu ekunda, tebana, navakundije vaghuhane.

³⁷ Mira ula edindie he ngoro yakwe, tesingirijwa, mira eidima kutetia kikundire chakwe, kangi erekere he ngoro yakwe kumrinda mwanawe, eketa chedi.

³⁸ Heicho emwovoja mwana wakwe eketa chedi, na ula esimwovoja eketa chedi kukela.

³⁹ Mche marongo ose mghosiwe ereho echungiwe, mira mghosiwe ekifwa, achunguwa; kive kughuhwa ni kila mntu emwenda, mira he Mfumwa du.

⁴⁰ Mira chedi kukela ni kuikaa huvo; nivwo vuntu mi nevona nami nidunganya iti nina Mpeho wa Mrungu.