1 VAKORINTO 6 - Chasu New Testament 1967

Viziomo vyevatara Vakristo kurongiana

¹ Hama mntu wa henyu ena masa na mghenji, kive kumsitaka he vala vesina singisirya, esire he vala vezerire?

² Kana temumanyije iti vezerire venelaha ii si? ana kakicha ii si inelahwa ni unywi, tekimutara kuchwa masa madori?

³ Temumanyije iti tunevalaha vamalaika? Kakicha ni huvo, kalanto vintu vya ili isanga?

⁴ Kakicha muna hantu helahiwa vintu vya ili isanga, muvavika ze vala vesitarwa iti ni kintu he kanisa iti vamuchwie?

⁵ Niteta huvo nesa niidime kumusonisha; hama ni huvo, henyu tehena mntu ena kiugho eidima kuchwa masa a vandughu vakwe?

⁶ Mira musitakana mndughu na mndughu, kangi mozya he vala vesiitikije.

⁷ Heicho, uko ni kuduikiwa kwenyu do, mwekisatakana kivenye. Si keba kugumirija kurongiwa vivivi, kana si keba kughumbwa mari jenyu?

⁸ Mira kushigha icho, unywi murongia vantu vivivi na kuvaghumba mari javo; yee, hata ja vandughu venyu.

⁹ Kana temumanyije iti vareketa vivivi tevekapale vufumwa vwa Mrungu? Misiishwe, vareshinda kana varetasa miringu, kana vareshinda, kana vadai kana vareshinda kinyuma,

¹⁰ kana vakea kana varemotoka, kana vaengeji, kana varerara neri vakibonda, tevekapale vufumwa vwa Mrungu.

¹¹ Na va kumwe he unywi vekiikee huvo. Mira mwaojwa, kangi mwazerijwa, mwatarirwa kitea he izina la Mfumwa Yesu Kristo, na he Mpeho wa Mrungu wetu.

Miikarire mivivi teikundiana na miikarire ya Kikristo

¹² Nekundijwe vintu vyose, mira si vyose vyeve; nekundijwe vintu vyose, mira tehenacho chenighosha mzoro.

¹³ Vijo ni vya ndeni, na ndeni ni ya vijo, mira Mrungu enevitesha vyose viri ndeni na vijo. Mira mwiri si wa kushinda, mira ni wa Mfumwa, na Mfumwa ni wa mwiri.

¹⁴ Mrungu emvushije Mfumwa he vefwie na uswi enetuvusha he vefwie kwa nzinya yakwe.

¹⁵ Hamao, temumanyije iti miri yenyu ni marungo akwe Kristo? Iki nighuhe marungo akwe Kristo niaoghoshe a mche mreshinda? Icho hai!

¹⁶ Kana temumanyije iti ula eandakana na mche mreshinda ni mwiri mmwe naye? Ambu eti, “Vala veri veneoka mwiri mmwe.”

¹⁷ Mira ula eandakane na Mfumwa ni mpeho mmwe naye.

¹⁸ Ahani kushinda! Kila ibanu mntu eketa liho nze ya mwiri wakwe; mira ye eshinda, eronga ibanu he mwiri wakwe mwenye.

¹⁹ Kana temumanyije iti miri yenyu ni nyumba ya mtaso ya Mpeho Wedi ula eho ndeni he unywi, mwemwinkiwe ni Mrungu? Neri unywi si mari yenyu venye;

²⁰ ambu mwezorirwe na zora mbaha. Heicho ra mtogoleni Mrungu he miri yenyu.