1 VAKORINTO 3 - Chasu New Testament 1967

Msopano ukanywa

¹ Mira vandughu vangu, mi siidime kuteta na unywi sa mwe vantu va miikarire ya kimpeho, mira sa vantu vena miikarire ya kimwiri, kangi sa vujana vunyenke he Kristo.

² Nemuinkie mavee iti munwe; simuinkeie kijo, ambu temwekinakiidima, yee, neki iki temukiidima,

³ ambu na ere iki mu vantu va miikarire ya kimwiri. Ambu ukinakiche henyu hena luiso na irenge, h’ii! temu vantu va kimwiri, kangi muanga sa vuntu chetara kivantu?

⁴ Ambu aho mntu ekiti, “Mi ni wakwe Paulo,” na ungi ekiti, “Mi ni wakwe Apolo,” h’ii, temu va kimntu?

⁵ Hama Apolo ni ani ne Paulo ni ani? Ni vandima mweitikije hevo, na kila mntu sa vuntu einkiwe ni Mfumwa.

⁶ Mi nehandie, Apolo akanwesha; mira mreehija ni Mrungu.

⁷ Kakicha ni huvo, mrehanda neri mrenwesha si kintu, esire Mrungu mreehija.

⁸ Heicho mrehanda na mrenwesha veringane, mira kila mntu eneinkwa kitumulilo chakwe mwenye cheringane na kubinuka kwakwe.

⁹ Ambu uswi tu vandima hamwe na Mrungu, unywi mu mghunda wa Mrungu, kangi mu ijengo lakwe Mrungu.

Chevatara vaalimu

¹⁰ He kiringanyo cha mbonea ya Mrungu neinkiwe, mi sa m’baha wa vajengi ena kiugho, nejengie msingi, na mntu ungi ejenga wanga hewo. Mira kila mmwe narerehe sa vuntu ejenga hewo.

¹¹ Ambu tehena mntu eidima kujenga msingi ungi esire ula wekenjije kujengwa eye Kristo Yesu.

¹² Mira mntu ekijenga wanga he uo msingi, dhahabu, kana fedha kana mabwe a zora mbaha, kana miti, kana mani, kana mabuva, ndima ya kila mntu inemanyika,

¹³ ambu ula msi uneimanyisha, ambu inefunyirijwa he moto; na uo moto uneghesha ndima ya kila mntu vuntu yeikee.

¹⁴ Ndima ya mntu ejengie wanga hewo yekiikaa, eneinkwa kitumulilo.

¹⁵ Ndima ya mntu yekisha enetesha; mira ye mwenye enekijwa, mira ni sa kutang’olwa he moto.

¹⁶ Temumaanyije iti mu nyumba ya mtaso ya Mrungu, na Mpeho wa Mrungu etue he unywi?

¹⁷ Kakicha mntu ekonda nyumba ya mtaso ya Mrungu, Mrungu naye enemkonda uo mntu, ambu nyumba ya mtaso ya Mrungu yezerire, eyo unywi.

¹⁸ Mntu asikuishe ye mwenye; kakicha hena mntu he unywi eti ena kiugho he ii si, naoke kirundu, niho eneoka mkiugho.

¹⁹ Ambu kiugho cha ii si ha Mrungu ni vurundu. Ambu heandikwe: “Ye niye evagurija vakiugho kiavya chavo;”

²⁰ kangi: “Mfumwa emanyije madunganyo a vakiugho iti ni sutwa.”

²¹ Heicho hasikete mntu ekukaza vuntu vwa vantu. Ambu vyose ni vyenyu.

²² Kari ni Paulo, kana Apolo, kana Kefa; kana ii si; kana nkalamo, kana kifwa, kana vila vyeho iki, kana vila vyeneoka; vyose ni vyenyu,

²³ na unywi mu vakwe Kristo, ne Kristo ni wakwe Mrungu.