1 VAKORINTO 2 - Chasu New Testament 1967

Kiugho na mfunukuro

¹ Nami vandughu vangu, hala nekiza henyu, sizie kumubirikira mpiso ya Mrungu na viteto vya kinyenyembwe kana vya kiugho.

² Ambu hala neho henyu siendie kumanya kintu kingi henyu, esire Yesu Kristo, naye evambiwe he msalaba.

³ Nami neikae henyu miikarire ya vusoka na fole na kuzingiza kubaha.

⁴ Kangi kiteto changu, na mibirikirire yangu seki ya viteto vya viugho vyekengereja macha a vantu, esire he vya viugho mivonyeshije ya mpeho na nzinya,

⁵ nesa mwitikijo wenyu usioke wa viugho vya kivantu, mira he nzinya ya Mrungu.

⁶ Mira hena kiugho tweteta he vala vekoloke, mira si kiugho cha ii si, neri cha avo vetetia ii si vekondika;

⁷ mira tuteta kiugho cha Mrungu he mpiso, kila kiugho chevisiwe, echo Mrungu ekikirekere too kae, kioke ngazo yetu;

⁸ echo varetetia si ii vesikimanyije neri mmwe, ambu nanga vekimanyije tevekimvamba Mfumwa wa ngazo he msalaba;

⁹ mira, sa vuntu cheandikwe: “Vila vyesinavonwa narini ni iziso, neri vyesinasikiwa ni isikio, Neri vyesinaingia he ngoro ya mntu, Vintu evyo Mrungu evaringanyije vala vemkunda.”

¹⁰ Mira Mrungu etufunukurire uswi he Mpeho. Ambu Mpeho esaka vyose hata mpiso ja Mrungu.

¹¹ Ambu ni mntu ani emanya madunganyo a mntu, esire mpeho wa mntu eho heye? Nirehuvo, na vila vya Mrungu tehena evimanyije esire Mpeho wa Mrungu.

¹² Mira uswi tetughuhie mpeho wa ii si, esire Mpeho efuma ha Mrungu, nesa tumanye vila tweinkiwe ni Mrungu.

¹³ Navyo tweteta, si he viteto vyechejwa kwa kiugho cha kimntu, esire vyechejwa ni Mpeho, twekiringanya vya Mpeho kimpeho.

¹⁴ Ambu mntu wa miikarire ya kimoghwa teidima kughuhia vila vya Mpeho wa Mrungu, ambu heye ni vurundu, neri teidima kuvitwarija, ambu vitwarijwa kimpeho.

¹⁵ Mira mntu wa kimpeho etwarija vyose, mira ye tetwarijwa ni mntu.

¹⁶ Ambu ni ani emanyije madunganyo a Mfumwa, nesa amcheje? Mira uswi tuna madunganyo akwe Kristo.