1 VAKORINTO 12 - Chasu New Testament 1967

Viinkwa vya kimpeho vyetekana kangi vyya vumwe

¹ Vandughu vangu, sienda mwekisatwarija vila viinkwa vya kimpeho.

² Mwemanyije kuti hala mwe va kiisanga mwekitikwa he mirungu yesiidima teta, vuntu mwetonjijwe.

³ Heicho nimumanyisha iti tehena mntu eteta he Mpeho wa Mrungu, eti, “Yesu nararwe,” neri mntu teidimateta iti, “Yesu ni Mfumwa,” esire he Mpeho Wedi.

⁴ Heicho viinkwa vyetekane; mira Mpeho nireye mmwe.

⁵ Kangi hena mtekano he kuhirira, mira Mfumwa nireye mmwe.

⁶ Kangi hena mtekano he kuronga ndima, mira Mrungu nireye mmwe eronga ndima jose he vose.

⁷ Mira kila mntu ejuvuiwe kihakwe ni Mpeho, nesa vaghenjanye.

⁸ Ambu mntu mmwe einkiwe kiteto cha kiugho ni Mpeho;

⁹ ungi he Mpeho uo uo einkiwe mwitikijo, ungi viinkwa vya kubanja he Mpeho uo uo mmwe;

¹⁰ na ungi kuvusha virumo, ungi kurota, ungi kutwarija ngoro, ungi kumanya vitetire vijinki, na ungi kuherereja vitetire.

¹¹ Ivyo vyose ni Mpeho uo uo mmwe evironga, ekimghavia kila mntu chakwe vuntu ekunda.

Kurerehia mwiri

¹² Ambu sa vuntu mwiri e mmwe, nawo wena marungo mangi, na marungo ose a uo mwiri mmwe nziaho ni mangi, nire mwiri mmwe; ne Kristo nirevwo.

¹³ Ambu uswi vose twebatizwe he Mpeho mmwe, tukaoka mwiri mmwe, na ere Vayuda kana Vagriki, na ere vazoro kana nkombolwa; uswi vose twenweshijwe Mpeho mmwe.

¹⁴ Ambu mwiri si irungo imwe, mira ni mangi.

¹⁵ Kughu kwekiti, “Kila mi nesi mkono si wa mwiri;” hamao, he vuntu uvwo si kwa mwiri?

¹⁶ Na isikio lekiti, “Kila mi ne si iziso, si wa mwiri;” hama he vuntu uvwo si la mwiri?

¹⁷ Kakicha mwiri wose wekioka iziso, kusikia kuohi? kana wose wekioka isikio, kunusha kuohi?

¹⁸ Mira Mrungu evikie marungo kila imwe lao he vuntu ekundie.

¹⁹ Nanga marungo ose ekioka irungo imwe, mwiri wekioka ze?

²⁰ Mira iki marungo ni mangi, na mwiri ni mmwe.

²¹ Kangi iziso teliidima kuuti mkono: “Sina mburi nawe;” neri mtwi teudima kuati maghu: “Sina mburi na unywi.”

²² Mira ala marungo a mwiri etiwa esokere, nio eendwa kukela.

²³ Na ala evoneka iti teena shima, nio tweashimia kukela mno. Na marungo etu esina kilanga, nio ena kilanga kukela.

²⁴ Ambu marungo etu ena kilanga teena cho eenda, mira Mrungu erunganye mwiri na kuinka kila irungo idori shima kukela;

²⁵ nesa he mwiri hasikete mtekano, esire iti marungo ose arerane.

²⁶ Irungo imwe lekiwajwa, marungo ose ewajwa hamwe nalo; na irungo imwe lekikazwa, marungo ose eizihirwa hamwe nalo.

²⁷ Heicho unywi mu mwiri wakwe Kristo, na marungo kila imwe kihalo.

²⁸ Mrungu evikie va kumwe he kanisa, va kuvoka ni ntume, va keri ni varoti, na va katatu ni vacheji, kangi hena venye nzinya na kuketa virumo, kangi va viinkwa vya kubanja vawaji, na maghenjanyo, na varetetia, na kuteta vitetire vijinki.

²⁹ Hamao, vose ni ntume? Vose ni varoti? Vose nire vacheji? Vose nire vareketa virumo?

³⁰ Vose vena viinkwa vya kubanja? Vose verateta vitetire vijinki? Vose veherereja?

³¹ Mira endishani viinkwa vila e vibaha. Nami nimuvonya nzia eyo yedi kukela.