1 VAKORINTO 10 - Chasu New Testament 1967

Ichundwe he mburi ya Kiisraeli

¹ Ambu, vandughu vangu, sienda mwekisamanya iti, vavava vetu vose vekiho kijusi ya ijumbi; vose vakavechija ghati he bahari;

² vose vakabatizwa vaoke vakwe Mose, he ijumbi na he bahari;

³ vose vakala kijo kila kila cha kimpeho;

⁴ vose vakanwa chanwa kila kila cha kimpeho, ambu venwiie he lila ikamba la kimpeho lekivaratera; na lila ikamba neki Kristo.

⁵ Mira vajinkisha hevo Mrungu tekivaizihirwe, ambu evabuntiie he nyika.

⁶ Heicho, ivyo vintu vyeokie fwanyanyi hetu, nesa tusioke varemotokia vivivi sa vuntu vala vemotoke.

⁷ Neri musioke varetasa mirungu, sa vuntu va kumwe hevo vekiikee; sa vuntu cheandikwe: “Vantu vekiikae si kula na kunwa, vekikenja vakavuka kuvina.”

⁸ Neri tusishinde, sa vuntu va kumwe veshindie, vakafwa msi mmwe vantu viku makumi meri na vitatu.

⁹ Neri tusimgheshe Mfumwa, sa vuntu va kumwe hevo vemgheshije, vakakondwa ni nyoka.

¹⁰ Neri musidunkunyike, sa vuntu va kumwe hevo vedunkunyike, vakakondwa ni mrekonda.

¹¹ Ivyo vintu vyose vyeokie hevo nesa vitucheje, vakaandikwa kutuchunda uswi, twefikiiwe ni msio wa igheri.

¹² Heicho ula ekuvona iti eimuke, arerehe asiregwa.

¹³ Temunaziiwa ni mghesho esire wa kiringanyo cha kivantu. Mira Mrungu ni mkitengo; ye tekamushighe mugheshwe kukela vuntu mweidima; ambu hamwe na uo mghesho, enevika kapengere ka kukiia, nesa muidime kugumirija.

Mitaso ya mirungu iahwe

¹⁴ Heicho ra, vakunde vangu, ahani mitasire ya mirungu.

¹⁵ Niteta sa neteta na vantu vechee; ririkanani venye icho neteta.

¹⁶ Kila kikombe cha lutelwedi twekiinka lutelwedi, hama si sanga ya sakame yakwe Kristo? Na ula mkate tweubendua, si sanga ya mwiri wakwe Kristo?

¹⁷ Kila mkate e mmwe, na uswi twe vajinki tu mwiri mmwe; ambu uswi vose tughaviana uo mkate mmwe.

¹⁸ Rerehani Vaisraeli vuntu vekiangie kimwiri. Vala vela vyetasie tevena vumwe na meza ya mtaso?

¹⁹ Niteteni wa? iti kila chetasie mirungu ni kintu? Kana mirungu ni kintu?

²⁰ Icho hai, mira vila vevifunya itasi, vevifunya he mashetani, neri si he Mrungu; nami sienda mukete sanga na mashetani.

²¹ Temuidima kunwia kikombe cha Mfumwa na kikombe cha mashetani. Temuidima kuketa vumwe na meza ya Mfumwa na meza ya mashetani.

²² Kana tuta mgera Mfumwa kiru? Kana tutena nzinya kumkela?

²³ Vintu vyose vikundijwa, mira si vyose vyeve. Vintu vyose vikundijwa; mira si vyose vyejenga.

²⁴ Mntu asikuendie chakwe mwenye, esire cha mghenji.

²⁵ Vyose vyetaghwa he kiete lani, neri musivwijevwije vuntu vwa izii la ngoro;

²⁶ ambu, ii si na vyose vyeizue heyo ni vya Mfumwa.

²⁷ Mntu esiitikije ekimurarika, na unywi mwekienda kuswi, lani vyose vyevikiwe mozya he unywi, musivwijevwije vuntu vwa izii la ngoro.

²⁸ Mira mntu ekimuvwira iti iki kintu chetasiwe mirungu, musile, vuntu vwa ula amumanyisha, na vuntu vwa izii la ngoro.

²⁹ Nitetia izii la he ngoro, mira si lako esire la ula ungi. Ambu hanini vukomboli vwangu vwekilahwa ni izii la ngoro la mghenji?

³⁰ Kakicha mi nila changu kwa kuvika mvera, hanini nerarwa kwa kintu nekivikia mvera?

³¹ Heicho, mwekila, kana mwekinwa, kana mwekiketa kintu chochose, ketani vyose he ngazo ya Mrungu.

³² Musivahoshe Vayuda kana Vagriki kana kanisa la Mrungu;

³³ nirehuvo, sa vuntu mi nevaizihija vantu vose he vintu vyose, nesikuendia vyangu mwenye, esire vya vangi nesa vakijwe.