1 TIMOTEO 6 - Chasu New Testament 1967

Vazoro

¹ Vose veho kijusi he igogolo la kizoro, na vamanye iti vazuri vavo vetarwa ni shima yose, izina la Mrungu lisirarwe neri michejire yetu.

² Na vala vena vazuri veitikije, vasivabere kila e vandughu, mira keba vavarongie ndima; ambu avo e vaghenji va lumazo lwa ndima yavo, vaoka vareitikija na vakunde. Iji mburi ujicheje na kuchunda.

Mafundisho a mongo

³ Mntu weso echeja michejire ingi, kangi esikunda viteto vya nkalamo vya Mfumwa wetu Yesu Kristo, kana michejire yesiteghania he kumfoleka Mrungu,

⁴ uo akubaa; neri tehena cho emanyije; mira vuwaji vwakwe ni kudunganya mburi ja mavwijo na kukanana he viteto, heo hefuma lwiso, na ivoo, na viraro, na midunganyije mivivi;

⁵ na makanano a vantu vekondike macha avo, vesovie idi, uko vedunganya iti kumfoleka Mrungu ni nzia ya kuvonia lumazo.

Vuzuri vwa idi

⁶ Mira kumfoleka Mrungu hamwe na kutisha ni lumazo lubaha.

⁷ Ambu tetuzie na kintu he ii si, neri tetuidima kuhafuma na kintu;

⁸ mira kakicha tuna kijo na suke, natutishe hevyo.

⁹ Mira avo veendisha kuteta mari vegwa he mighesho na he kitende, na kiherehere kijinki chesive, chekonda na kuhosha vantu he kuteka na kukondika.

¹⁰ Ambu kikolo cha evivivi vyose ni kukunda fedha; eyo vakumwe vekiimotokia vetana na mwitikijo, na kukusoma he ngoro na mavwasi mangi.

Machundwe

¹¹ Mira we mntu wa Mrungu aha ivyo vintu; uratere kitea. kumfoleka Mrungu, mwitikijo, lukundo, kugukirija, na vuhoo.

¹² Omana ila nkondo yedi ya mwitikijo; gurisha nkalamo ila ya kae na kae weitangiwe, ukazumira mwitikijo wedi mozya ya vaonwa vajinki.

¹³ Nikuazera mozya he Mrungu, eye ekalamija vintu vyose, na mozya he Kristo Yesu, eye ezumire vula vuonwa vwedi vwa mwitikijo mozya he Pontio Pilato,

¹⁴ iti urinde iazero ili hesina madamaro, hesina lushagho, mhaka kufunukurwa kwa Mfumwa wetu Yesu Kristo,

¹⁵ ekwo he igheri lakwe enekufumukura, eye ekikaziwe, eye du Mwenye nzinya jose, Mfumwa wa vafumwa, M’baha wa vabaha;

¹⁶ eye du esivonwa, eikaa he kianga chesive kufikiwa; neri tehena mntu anamvona, kana eidima kumvona. Shima na nzinya ni vyakwe kae na kae. Amen.

¹⁷ Vala e vazuri va si ii ya iki vakanywe vasikubae, neri vasivike ikuji he vuzuri vwesiikaa, mira vamwarire Mrungu eye etuinka vintu vyose kwa mnesha, nesa tuvile na kuizihirwa.

¹⁸ Varonge vyedi, vaoke vazuri he kuronga vyedi, vakuringanye kufunya mari javo, vakete sanga na vangi kingoro;

¹⁹ kangi vekikuvikia ndungu ioke msingi wedi he igheri leneza, nesa vavone nkalamo ya idi.

²⁰ We Timoteo, rinda vila wevigurijwe; utane na migayo ya sutwa, yesina nzia, na makanano eitangwa icha uko ni mongo;

²¹ elo va kumwe vakanalizumira, vesova mwitikijo. Mbonea na iikae hamwe na unywi.