1 TIMOTEO 5 - Chasu New Testament 1967

¹ Mghosi mzima usim’bohije, mira umchunde sa vaveo; na vabwange sa vajinao;

² vache vekuie sa vamlala wenyu; vache va marika sa varumburyo; he kukuzerija kwose.

Chetara kuvaketia vache vefwiiwe ni vome, he Kanisa

³ Vache vefwiiwe ni vome, uvashimie.

⁴ Mira mche efwiiwe ni mme kakicha ena vana kana vakokoye, varongekucheja mitasire ya kimpeho chevatara he ndughu javo, na kuvahunduia vamoghi vavo vyedi. Ambu icho nicho chekundika he Mrungu.

⁵ Mira mche efwiiwe ni mme na kushighwa ye mwenye, uo evikie ikuji he Mrungu, kangi aikae genda he maombi na mitaso msi na kio.

⁶ Mira ula eratera kiherehere chakwe mwenye, efwie nziaho eho moo.

⁷ Uvaazere ivyo navyo, nesa vaoke vantu vesina cho veshaghwa.

⁸ Mira mntu ula esirera vala e vakwe, nikwo kuti vala e va kaa hakwe mwenye, akana mwitikijo, kangi ni mvivi kuvecha mntu esiitikije.

⁹ Mche efwiiwe ni mme asiandikwe esinakolosha miaka makumi mtandatu; kangi kari se ki mche wa mme mmwe;

¹⁰ mira aoke etetiwa vuonwa he mihiro yedi, kangi kakicha ererie vana, kangi eghuhia vaghenji, kangi eojije vezerire maghu, kangi eghinjije vala verishwa vwasi, kangi eratere nezo mirongire yedi yose.

¹¹ Mira vache vairika vefwiiwe ni vome usivaandike, ambu vekikwewa ni kiherehere, veenda kughuha vamshighe Kristo;

¹² navo veho he milaho, kila vashigha mwitikijo wavo wa kuvoka.

¹³ Kangi hamwe na icho, vekucheja kuoka vavia, veangaanga nyumba kwa nyumba; neri si vavia du, mira ni varesembeka na valuteta na kuteta viteto vyesivatara.

¹⁴ Hena icho nekikunda iti vache vairika vefwiiwe, vaghuhwe vamoghe vana, vatetie ndima ja kaa javo; nesa vasimunke mnzo kapengere ka kutushaghia.

¹⁵ Ambu va kumwe vakenja kuteka na kumratera Shetani.

¹⁶ Kakicha hena mche eitikije, ena vandughu vefwiiwe ni vome, avaghenje mwenye, kanisa isemeiwe, nesa ivaghenje du vala vache vakiva cha idi.

Vaghosi

¹⁷ Vaghosi vala vetetia nezo vatarirwe kuinkwa shima kantu keri; kukela ni vala vekubinusha he kubirikira na kucheja.

¹⁸ Ambu maandiko eti: “Ng’ombe yyekivata ngano iti ijishunte usiichungwe momo;” kangi, “Mndima kitara ainkwe mhako wakwe.”

¹⁹ Mghosi ekisitakwa usikunde kumkola masa hesina vuonwa vwa vantu veri kana vatatu.

²⁰ Vala vezikabama uvabohie mozya he vose, nesa vangi vafoleke.

²¹ Nikukokontia mozya he Mrungu, na mozya he Kristo Yesu, na he vamalaika vesaghurwe: Rinda ijo mburi, usikete sombo wekirereha mntu.

²² Usimangemvikia mntu mikono, neri usikete sanga na mabanu a vantu vangi. Ukurinde ngoro yako uzere.

²³ Kuvokia iki usinwe mpombe du, mira unwe mvinyo hadori, vuntu vwa itumbo lako, na mavuwaji ekugura genda genda.

²⁴ Mabanu a vantu vangi emanyike boo, nao erongora na he milaho, vangi mabanu avo evaratera.

²⁵ Nirehuvo, mirongire yedi yemanyike boo, na ila yesimanyike teikuvisa.