1 TIMOTEO 4 - Chasu New Testament 1967

Chevatara kuvaketia vacheji va mongo

¹ Mira Mpeho eteta boo, iti, igheri la msirikijo vakumwe venetana na mwitikijo, vekisikija mpeho jeisha, na michejire ya mashetani;

² he lung’ong’o lwa vantu veteta mongo, vekishota madunganyo avo michire;

³ vekikinda vantu kughuhana, na kuzihija vantu he vijo, evyo Mrungu evirumbie vighuhiwe kwa mvera ni vala vena mwitikijo na varemanya ilo idi.

⁴ Ambu chose cherumbiwe ni Mrungu ni chedi, neri tehena chesuwa, kakicha chekighuhiwa kwa kuvika mvera;

⁵ ambu chezerijwe ni kiteto cha Mrungu na kuomba.

⁶ Uvakumbushe vandughu mburi ijo, nawe uneoka mndima wedi wakwe Kristo Yesu, na mremanyera viteto vya mwitikijo, na michejire yedi ila weiratere.

⁷ Mira simo ja kikae, esija kimurungu, ujisue, nawe ukumanyirije kumfoleka Mrungu.

⁸ Ambu kukumanyirija kuketa nzinya ja mwiri, kuve hadori, mira kumfoleka Mrungu kuve he mburi jose; ambu kuna kiravo cha nkalamo ii na ila yeneza uko nyuma.

⁹ Ni kiteto cha kuitikijwa, kangi, chetara kukundikwa haiwa;

¹⁰ ambu tukubinusha na kukudindija vuntu vwayo, ni kila twemwarira Mrungu ekalama, eye Mkija wa vantu vose, na kukela ni wa vala vemwitikija.

Miikarire na mafundisho akwe Timoteo

¹¹ Uazere ijo mburi na kujicheja.

¹² Hasikete mntu efalaja vubwange vwako, mira aoke kivonyesho he vala veitikije, he kuteta na he mitongire, na he lukundo na mwitikijo na kuzera.

¹³ Ukundije he kusoma na kuchunda na kucheja mhaka nekineza.

¹⁴ Usibere kila kiinkwa wena nacho, wekiinkiwe kwa vuroti na he kuvikiwa mikono ni vaghosi.

¹⁵ Ukubinushe kajinki na ivyo vintu, na kuikaa hevyo; nesa mitomgire yako ivoneke boo he vantu vose.

¹⁶ Kurinde we mwenye na michejire yako. Gurisha icho; ambu wekiketa huvo unekukija we mwenye na vala vekusikia.