1 TIMOTEO 3 - Chasu New Testament 1967

Vabaha va Kanisa

¹ Ni kiteto chetara kuitikijwa, mntu ekienda ndima ya Uaskofu, ena nkwina ya ndima yedi.

² Heicho, kimtara Askofu aoke mntu esinacho eshaghwa, mme wa mche mmwe, mwenye kiringanyo na kiugho, ena miikarire yedi, ena kise, eidima kucheja;

³ esi mntu emanyirire vuengeji, esilwana na vantu, mira aoke mhoo; si sa mwenye nkani, neri asioke mrekunda fedha;

⁴ mntu etetia kaa yakwe nezo, eidima kutetia vana vakwe vakete shima;

⁵ ambu mntu esiidima kuimukia kaa yakwe mwenye, enerera ze kanisa ya Mrungu?

⁶ Neri asioke mntu egharuke misi ya hafuhi, nesa asirekubaa akagwa he mlaho wakwe Shetani.

⁷ Kangi kimtara kutetiwa vuonwa vwedi ni vantu veho uko nze, nesa asiregwa he kushaghwa na kuingia he kitende chakwe Shetani.

⁸ Nirehuvo, Vachungi vaoke vantu vena miikarire yedi, si vantu vena kigharugharu, si varenwiisha mawa, si vareendisha lumazo luvivi;

⁹ vekigurisha mpiso ya mwitikijo kwa ngoro yezerire.

¹⁰ Hata avo varongegheshwa; vanaronge iyo ndima ya vuchungi, aho vanavoneka iti tevena nzune.

¹¹ Nirehuvo, vache vavo navo vakete miikarire yedi, si varechungija mongo, vena kiringanyo, vakitengo he vintu vyose.

¹² Vachungi vaoke vome va mche mmwe, vekitetia vana na kaa javo nezo.

¹³ Ambu vala veronga nezo ndima ya vuchungi vevona shima yedi, na kuketa ikuji ibaha leho he kumwitikija Kristo Yesu.

¹⁴ Nikuandikia ivyo nekiarira kuza hako he misi ya hafuhi.

¹⁵ Mira kakicha nakaisha, umanye vuntu chetara vantu kutonga he nyumba ya Mrungu, eyo kanisa ya Mrungu mwenye moo, ngwijo ya msingi wa idi.

¹⁶ Tehena kuganganya, mpiso ya kumfoleka Mrungu ni mbaha. Mrungu efunyirijwe he mwiri, Akamanyika iti ni mwenye singisirya he kimpeho, Akavonwa ni vamalaika, Akabirikirwa he vaisanga, Akaitikijwa he ii si, Akakwejwa uko wanga he ngazo.