1 TIMOTEO 2 - Chasu New Testament 1967

Vurongoji he mitaso

¹ Heicho, chavokia he vyose, nienda mtaso, na maombi, kutanja na kuanjela, virongwe vuntu vwa vantu vose,

² he vuntu vwa vufumwa na vahaba vose, nesa tuikae na vumpoa na mporere, he kumfoleka Mrungu kwose na shima.

³ Icho ni chedi, nacho kikundika he Mrungu Mkija wetu;

⁴ ekunda vantu vose vakijwe, na kuenda kumanya vila e vya idi.

⁵ Ambu Mrungu ni mmwe, na mrekundanya eho ghati ya Mrungu na vantu ni mmwe, ni Kristo Yesu, e mntu;

⁶ eye ekuinkije mwenye kuoka irivi he vuntu vwa vose, letetiiwe vuonwa igheri lako.

⁷ Nami he vuntu vwa ilo nevikiwe nioke m’birikiji na ntume -niteta idi siteta mongo-, mcheji wa Vakiisanga he mwitikijo na he idi.

⁸ Nienda iti kila hantu vantu va kiume vaombe, vekivushija mikono yezerire, vesina oro neri nkani.

⁹ Nirehuvo, vache navo vakuhambe na suke jekoloka kkuvafinikira, hamwe na shima, na kucha kwedi; si he kusukanywii, neri kudoka dhahabu kana lulu, kana suke ja zora mbaha;

¹⁰ esire he mirongire yedi, sa vuntu chevatara vache vala vekunda kumfoleka Mrungu.

¹¹ Kangi mche akucheje kuoka mhoo, ekisikia he kila kintu.

¹² Simkindija mche kucheja, neri kumtetia mme, mira aoke mhoo.

¹³ Ambu Adamu niye erongerumbwa, Eva akanarumbwa.

¹⁴ Neri Adamu tekengerwe, mira mche niye ekengerwecha do, akaingia he mateshanyo.

¹⁵ Mira enekijwa he kumogha vana, kakicha vekiikaa he mwitikijo na lukundo na kuzera, hamwe na ngoro ya kiringanyo.