1 TIMOTEO 1 - Chasu New Testament 1967

Ngezya na machundwe he mafunukuro a mongo

¹ Paulo, ntume wakwe Kristo Yesu, he iazero la Mrungu Mkija wetu, he Kristo Yesu, kiariro chetu;

² Hakwe Timoteo, mwanangu mwenye he mwitikijo. Mbonea, na mbazi, na mporere, vyefuma he Mrungu Vava na he Kristo Yesu Mfumwa wetu, navikuikaie.

³ Sa vuntu nekusembie iti uikae Efeso, hala nekizoka kutonga Makedonia, nesa uvasuje vangi vasicheje michejire ingi;

⁴ neri vasirerehe simo na malukolo esihakana, vyeete kuvwijavwija kukela ndima ya Mrungu yeho he mwitikijo; heicho keta huvo.

⁵ Mira kuvecha vyose nemuazera, ni lukundo lwefuma he ngoro yeelile, na izii ledi la he ngoro, na mwitikijo wesina lung’ong’o.

⁶ Vangi vekinavisove ivyo, vakagharukia mburi esi ja idi;

⁷ vekunda kuoka vacheji va viziomo uko tevemanyije eho veteta, neri kukonesha vila veviteta.

⁸ Mira mwemanyije iti viziomo ni vyedi, kakicha mntu eviratera he nzia ya idi;

⁹ ekitwarija mburi ii, iti, kiziomo tekimtara mntu wa kitea, esire valubero, na vapapari, na vesimfoleke Mrungu, na vabanu, na vesizerire, vesimmanyije Mrungu, na vekoma vavavee na vamee, na vekoma vaghenji,

¹⁰ na vareshisha, na vambile, na vareiva vantu, na vamongo, na vala vekirigha mongo; na kakicha hena mburi ingi yasiveiana na michejire ya nkalamo;

¹¹ sa vuntu chetetiwe he Mburi Yedi ya ngazo ya Mrungu ekazwa, eyo neivikiiwe mchunga.

Kuanjela kwakwe Paulo he vuntu vwa mbonea ya Mrungu

¹² Nimwanjela Kristo Yesu Mfumwa wetu, enigerire nzinya kila enivonie iti ni mkitengo, akanivikia he ndima yakwe;

¹³ nziaho aho kuvoka nekimzafalaja, na mrerisha vantu vwasi, na mtiri, mira nikavona mbonea kila neketie huvo he vurundu na kusaketa mwitikijo.

¹⁴ Na mbonea ya Mfumwa wetu inetishe, hamwe na mwitikijo na lukundo lweho he Kristo Yesu.

¹⁵ Ni kiteto cha kuitikijwa, kangi chetara kukundika haiwa, iti, Kristo Yesu ezie aha si akije vabanu; evo wa kuvoka hevo, nimi.

¹⁶ Mira he mburi ii nikavoneiwa, nesa hemi wa kuvoka, Yesu Kristo afunyirije kugumirija kwakwe kwose; nioke kivonyesho he vala venezeremwitikija, vainkwe nkalamo ya kae na kae.

¹⁷ Iki he mfumwa wa kae na kae, esikondika, esivonwa, Mrungu ere mmwe, shima na ngazo ni vyakwe kae na kae. Amen.

¹⁸ Mwanangu Timoteo, nikugurija ilo iazero, he mburi ya viteto vya vuroti vyerongore hewe, nesa he ivyo uomane ila nkondo yedi;

¹⁹ uoke mreitikija na izii ledi la he ngoro, ewo vakumwe veusampie, vakakondika he mburi ya mwitikijo.

²⁰ He avo hemna Himenayo ne Aleksanda, evo nevainkije he Shetani, nesa vakucheje vasimfalaje Mrungu.