Zefania 3 - Mukanda Wa Zambi 1970

Kuvulumuna cha akwa Yerusaleme ni ukule wo

¹ Akwa Yerusaleme lamba lio, limbo ha uhenge ni lia uhulia lize Wakubinjisa atu jenyi mwene.

² Kaabanjikile ko kuli Mwene Zambi, kaatayijile ko kufumba chenyi. Kaashachilile ko hali Mwene Zambi, kaamuhulile ko ha kwakwasa.

³ Akwa lutwe jenyi kaali ngwe tambwe waze anahiohio. Ngaji jenyi kaali ngwe tungunga waze anevu zala, akwa lwahu kuhiana, keeshi kululika chifwaha nichimwe ndoo chichamene.

⁴ Akwa munanyi kaali atu alelu kanda akwa mafwefwe. Mahako kaakuchisa yuma ya chijila, kaakubinjisa Shimbi ja Zambi ha kufumbula cho ene.

⁵ Alioze Mwene Zambi kali mu limbo ndoo ni musono, kakulinga chize chinalite, keshi kulinga chibi nichimwe. Tangwa ha tangwa chichamene kakubatwila atu jenyi ni ululi. Chibwe chocho yitanganyanyi waze alimo kaakulinga yibi, keeshi kwivwa sonyi.

⁶ Mwene Zambi kanambe ngwenyi: “Hingunonona mavungu amuwundu, hingunenyeka membo jo, ni kububa yipanga yo ni mazuwo jo asuku. Membo jo haabwa ahululu, mu majila kumwasalile niumwe.

⁷ Yingunyonga ngwami, atu jami mba himangulemesa ni kutayiza longeso liami, hikeechi kavulama nawa longeso lize hingunaalongesa. Alioze susumuku kaakulinga yibi ngwe hatangu.”

⁸ Mwene Zambi kanambe ngwenyi: “Shimbwilenu tangwa lize mungukatuka ni kusuma mavungu. Hinabatula kukungulula mavungu ni mawanangana hanga amone tachi ja ufwatulo wami. Mungwonona hashi heswe ni utenu wami.

⁹ “Mba mungwalumuna mbunge ja akwa mavungu. No maalemba kuli yami wika, hi kuli mazambi eka ko. Eswe maangwononokena.

¹⁰ Chibwe atu jami waze amwangashanyine kusuku mu chifuchi cha Sudane maangulambula milambu.

¹¹ Ha matangwa waze yenu atu jami hikunuchi kwivwa nawa sonyi mumu nwangukatukilile. Munguchiza akwa kulengumuka ni akwa kulizata eswe, kunuchi kungukatukila nawa ha mulundu wami wa chijila.

¹² Munguhichika ko akwa kushimbika ni akwa kulikehesa, waze meeza kuli yami hanga ngwakwase.

¹³ Aisraele waze maasala ni mwono keechi kulinga chibi kuli mutu niumwe, keechi kuhanjika mahuza, hanji kweseka kwonga. Kumaayuka, kumaatwama mu uhwimino, keechi kuvwila niumwe woma.”

Mwaso wa chiseke

¹⁴ Yenu Aisraele, imbenu mwaso wa chiseke! Yenu akwa Yerusaleme, likwizenu ni mbunge jenu jeswe!

¹⁵ Mwene Zambi hasa songo ku lamba lienu; Akwa kole jenu eswe haachiza. Mwene Zambi, mwanangana wa Aisraele, kali hamwe ni yenu; Haliabwila kukushi nawa nichimwe chize munuvwila woma.

¹⁶ Tangwa kulineza lize maambila Yerusaleme ngwo: “Limbo lia Zione, kanda wivwa woma! Moko je kanda alekumuka!

¹⁷ Mwene Zambi, Zambi yenu, kali hamwe ni yenu; ndundo jenyi jinanukwase kukumba. Mwene Zambi mawahilila ni yenu, mu zango lienyi manwaha mwono Waha. Kumaanwimbila ni kuwahilila,

¹⁸ ngwe ku chimwe chiwanyino.” Mwene Zambi kanambe ngwenyi: “Hinasa songo ku utoji wa lamba lienu, hinachiza sonyi jenu.

¹⁹ Tangwa kulineza lize mungumwesa lamba waze akunubinjisa. Mungulamwina akwa kubalita, munguhilwisa njize ku mahiahia jo. Munguchiza sonyi jo, mungwalemesa. Akwa hashi eswe maachichimieka.

²⁰ Tangwa kulineza lize munguhilwisa ku mahiahia jo atu jenu waze amwangashanyine. Mungunufumanyisa hashi heswe, mungunuyukisa nawa.” Mwene Zambi hachamba.