Zefania 2 - Mukanda Wa Zambi 1970

Zefania yaliumba kuli atu ngwenyi: “Alumuke ku mbunge”

¹ Yenu vungu lize kunushi sonyi, kungulukenu, nyongenu

² shimbu kanda nuuma ni kulekama ngwe yitemo, shimbu kahia ka ufwatulo wa Mwene Zambi kanda kachikundama, shimbu kanda achisolola utenu wenyi.

³ Tewulukenu kuli Mwene Zambi, yenu eswe akwa kulikehesa a mu chifuchi, yenu waze nwakwononokena Shimbi jenyi. Lingenu yibema, likehesenu ku meso ja Mwene Zambi. Tangwa likwo kechi kunumwesa lamba ha tangwa lia ufwatulo wenyi.

Mwene Zambi mamwesa lamba yifuchi yize yajingilika Israele

⁴ Niumwe masala mu limbo lia Gaza. Limbo lia Ashkelone mulialumuka yikulu. Akwa limbo lia Ashdode maahuma ha shimbu likepe, akwa Ekrone maahumina mu limbo lio.

⁵ Yenu akwa chifuchi cha Filistia, lamba lienu, yenu waze nwatwama ku mbumbulu ya kalunga lwiji. Mwene Zambi hanubatwila, kumanunongesa, kukuchi kusala niumwe.

⁶ Chifuchi chenu cha ku mbumbulu ya kalunga lwiji muchalumuka chihila kuze mukubwa mazuwo ja tufunga ni matanga ja mapanga.

⁷ Ayuda waze maasala ni mwono enoo maazuka chifuchi chenu. Kwenako maalishila yimuna jo ni kubomba mu mazuwo ja akwa Ashkelone. Mumu Mwene Zambi mabwa hamwe no, maawahisa nawa.

⁸ Mwene Zambi Mukwa Ndundo Jeswe kanambe ngwenyi: “Hinevwa akwa yifuchi ya Moabe ni Amone chize anashililika atu jami ni kwachoka nikwamba ngwo: ‘Mututambula chifuchi chenu.’

⁹ Mwene Zambi Mukwa Ndundo Jeswe, Zambi ya Aisraele, kanambe ngwenyi: Ni mwe yami mwene, Amoabe ni Aamone kumaanonga ngwe chize anongene membo ja Sodome ni Gomora. Kumaabwa ngwe mena ja mungwa, kumeenyeka ndoo ku miaka yeswe, maasoka yambu yibi. Atu jami waze maasala ni mwono, e maabuba ni kutambula chifuchi cho.”

¹⁰ Chenacho Amoabe ni Aamone maamona lamba mumu haalizata, haalisuta, haashililika atu ja Mwene Zambi Mukwa Ndundo Jeswe.

¹¹ Mwene Zambi meevwisa mwongo. Mwene Zambi mapwisa mazambi a hano hashi amokomoko. Mba mavungu eswe maamuwayila, mutu mweswe mu chifuchi chenyi mwene.

¹² Mwene Zambi kumonona akwa chifuchi cha Sudane.

¹³ Mwene Zambi, ni ndundo jenyi, kumenyeka chifuchi cha Asuria. Limbo lia Ninive kumalibuzula, mulialumuka puya.

¹⁴ Mukachi ka limbo mumubomba yimuna ni tushitu eka ni eka. Yikungulu maatwama ha manguji ja mazuwo waze haabuzuka. Kuhanjeka cho maachivwa mu tupenda. Yikwakwalo maahanjikila ha mangazulwilo ja mazuwo. Mabaya a sedru ku mazuwo maachiza ko.

¹⁵ Yenayo muyibwa mu limbo lize liakulengumuka ni tachi jalio, lize liakunyonga ngwo, lili mu uhwimino. Atu jalio kaakunyonga ngwo, limbo lio lili linene kuhiana hano hashi. Kumulialumuka muma mwakutwama tushitu a mu yambu. Mutu mweswe yoze mabalika ko matungumuka ni mwongo.