Zefania 1 - Mukanda Wa Zambi 1970

¹ Maliji wano Mwene Zambi walwezele mukwa munanyi Zefania ha matangwa ja mwanangana Josia wa Yuda, mwana wa Amone. (Zefania te kali wa ku vungu lia mwanangana Hezekia, yikusula Amaria, ni Gedaliya, ni Kushi.)

Tangwa lize Mwene Zambi mabatwila atu

² Mwene Zambi yamba ngwenyi: “Mungwonona yuma yeswe ya hano hashi,

³ atu, ni tushitu, ni tujila, ni yishi. Mungulimbula yingulungulu. Mungwonona akwa hashi eswe, kuhechi kusala mukwa mwono niumwe. Yami Mwene Zambi nachamba.

⁴ “Mungumwesa lamba akwa Yerusaleme ni Ayuda eswe. Mungunongesa masalila waze akuwayila Bale, kukuchi kubwa nawa umwe yoze mewuluka mahako waze akulingila ku chilumbilo chenyi.

⁵ Mungunongesa mweswawo wakunyina ha fulumba ni kuwayila tangwa, ni kakweji, ni matongonoshi. Mungunongesa waze akunguwayila ni kulishinga ni jina liami, alioze kuma kaakulishinga nawa mu jina lia zambi Milkome.

⁶ Mungunongesa eswe waze haangumba nyima, waze keeshi kwiza kuli yami ni kunguhula.”

⁷ Tangwa lia Mwene Zambi hiliakundama lize Zambi mabatwila atu, kashika twamenu kuluu ku meso jenyi. Mwene Zambi kanalulika kulambula atu jenyi ngwe mulambu.

⁸ Mwene Zambi yamba ngwenyi: “Ha lie tangwa lize lia kushiha, mungumwesa lamba akwa lutwe, ni ana ja mwanangana a malunga, ni eswe waze akwimbulula ndako ja yilambala.

⁹ Mungumwesa lamba eswe waze akuwayila mahamba, ni waze akushiha atu ha kuzalisa mazuwo jo ni yuma ya kububa.”

¹⁰ Mwene Zambi kanambe ngwenyi: “Ha tangwa lize munwivwa mbimbi ku chikolo cha Yishi ku Yerusaleme. Kumunwivwa mbimbi mu chota chaha cha limbo, ni zungo linji ha milundu.

¹¹ Mba munulila mbimbi, yenu waze nwatwama ku mwanda wa limbo, mumu akwa kulanjisa eswe haafwa.

¹² “Ha tangwa lize mungwiza ni ndeya ni kubolongoza mu Yerusaleme. Mungumwesa lamba waze atwama mu uhwimino, waze akwamba ngwo: ‘Mwene Zambi kechi kulinga nichimwe, chibwe chibi chibwe chibema.’

¹³ Yikumba yo kumaayibuba ni kubuzula mazuwo jo. Keechi kutwama nichimwe mu mazuwo waze akutunga hanji kunwa vinyu ya ku mitondo yize atumbile.”

¹⁴ Tangwa linene lia Mwene Zambi hiliakundama, kulineza nikawashi! Mulibwa tangwa Usasu, chibwe tujita a tachi maalila mumu haalekumuka!

¹⁵ Mulibwa tangwa lia utenu, lia kubinda ni misongo, lia kwenyeka ni kwonona, lia ufuku ni chifuka, lia milima ni malelwa,

¹⁶ lia zungo lia yitavwi ya jita ni kukololoka cha tujita, ni kulwa membo akukoleka ni mazuwo asuku asuku.

¹⁷ Mwene Zambi kanambe ngwenyi: “Mungutuma lamba lieka ni lieka hali akwa hashi, mba mutu mweswe mapapata ngwe kapuputa. Haanguvulumuna, kashika manyinga jo maamwangana ngwe meya, ni mijimba yo muyikupuka vumba libi.”

¹⁸ Ha tangwa lize Mwene Zambi masolola utenu wenyi, chibwe prata jo jeswe hanji oru kuyichi kwalamwina nichimwe. Zambi monwona akwa hashi eswe ni kahia ka utenu wenyi. Masa songo kuli eswe waze atwama hashi.