Zakaria 9 - Mukanda Wa Zambi 1970

Mwene Zambi makabatwila mavungu enyembo ja Israele

¹ Wano e maliji ja Mwene Zambi: Habatula kumwesa lamba chifuchi cha Hadrake ni limbo lia Damasku Hi mavungu ja Israele wika ko, alioze ni lie limbo lia wanangana lia Siria kaali a mbala a Mwene Zambi.

² Chifuchi cha Hamate, chize chasulangana ni Hadrake, chili nichenyi, ni membo ja Tiru ni Sidone, ni akwa mana jo eswe kaali nienyi.

³ Tiru haamutungila yipanga yakukoleka, haalumbikila prata ni oru yinji ngwe mavu!

⁴ Alioze Mwene Zambi kumakamuchiza yuma yeswe yize ali nayo. Ubite wenyi kumaakaumbila mu kalunga lwiji, ni lie limbo kumaakaliocha.

⁵ Limbo lia Ashkelone kumaakachimona, maakevwa woma. Limbo lia Gaza no kumaakabinda ni lamba. Aekrone no keechi kabwa ni Chuma cha kusa mbunge. Gasa kumaakatokesa mwanangana wo, mu Ashkelone mumukabwa mwahululu.

⁶ Atu a ku mavungu akuchinga maakatwama mu Ashdode. Mwene Zambi kanambe ngwenyi: “Mungukakehesa Afilistia wano, akwa kulengumuka.

⁷ Keechi kalia nawa yifwo ni e manyinga jayo, chibwe yakulia yikwo ya chijila. Masalila eswe kumaakabwa a ku mbunga ya atu jami, kumaakabwa ngwe yoze jimo a ku vungu lia Yuda. Ekrone no maakabwa a ku mbunga ya atu jami, ngwe chize abwile Ajebuse.

⁸ Mba mungukafunga chifuchi chami ni kukinda tujita akwo kunjila mo. Chichi katayiza atu akalu kubinjisa nawa atu jami. Hinalimwena cho yami mwene chize atu jami haanamono lamba.”

Mwanangana yoze makeza

⁹ Yenu akwa Zione, wahililenu, wahililenu! Yenu akwa Yerusaleme kololokenu ni uwahililo! Talenu, mwanangana wenu kaneza kuli yenu! Mukwa kukumba wakangana, hindu mukwa kulikehesa, kanendela hali chimbulu, hali mwana yoze wasemukine kuli chimbulu.

¹⁰ Mwene Zambi kanambe ngwenyi: “Mungukachiza matemba a jita mu Israele, mungukachiza tuvwalu mu Yerusaleme; mata a jita mungukaamakwona. Mwanangana wenu makaneha uhwimino mukachi ka mavungu; makayula chize ku umwe kalunga lwiji ndoo ku mukwo, chize ku lwiji Ufrateze ndoo ku songo lia hashi.”

Mwene Zambi makahuzulula atu jenyi

¹¹ Mwene Zambi kanambe ngwenyi: “Mumu ha Usendo wami ni yenu uze nakolesele ni manyinga a milambu, mungukatusula atu jenu akakatuke mu wina wa undungo uze kuushi meya.

¹² Yenu njize hilukenu, hinwabwa ni shindakenyo ha kusa ko mbunge. Hilukenu ku chifuchi chenu cha uhwimino. Ngunanulweze ngwami, mungunukundulula yisuho yaali ni kunuwahisa ha lamba lize nwamwene.

¹³ Mungunana Yuda ngwe uta wa kajita ni Israele ngwe mivwi, akwa Zione ngwe mikwale, akase jita ni malunga ja Gresia.”

¹⁴ Mwene Zambi makasoloka helu lia atu jenyi; makasa mivwi yenyi ngwe mihenyo. Mwene Zambi makahumuna chitavwi; makendela mu chijimbi cha ku sude.

¹⁵ Mwene Zambi Mukwa Ndundo Jeswe makafunga atu jenyi, no maakonona akwa kole jo; e manyinga maakapukumuka ngwe manyinga a milambu waze haazujila ha chilumbilo mu musenge.

¹⁶ Muze lie tangwa alio hilieza, Mwene Zambi makalamwina atu jenyi, ngwe chize kafunga akulamwina mapanga jenyi ku utoji. Kumaakahenya mu chifuchi chenyi ngwe mawe a ndando yinji ha chipangula.

¹⁷ Muchikabwa chifuchi chibema chahiana! Akweze maakatakama ha kulia mbuto ni kunwa vinyu yacho.