Zakaria 8 - Mukanda Wa Zambi 1970

Mwene Zambi yalakenya kutungulula Yerusaleme

¹ Mwene Zambi Mukwa Ndundo Jeswe yalweza maliji wano kuli Zakaria ngwenyi:

² “Hasuku nachijile kukwasa Yerusaleme mumu nakuzanga atu jami kuhiana. Mumu ha zango lize, nevwilile akwa kole jo ufwatulo.

³ Mungukahiluka ku Yerusaleme, limbo liami lia chijila, ni kutwama mo. Maakalivuluka ngwo, limbo lia akwa kushishika. Mulundu wa Mwene Zambi Mukwa Ndundo Jeswe maakauvuluka ngwo, mulundu wa chijila.

⁴ Tushinakaji a malunga ni a mapwo waze maakendangana ni pango ha ushinakaji wo, maakatwama mu manjila ja limbo.

⁵ Mu majila ja limbo mumukazala ana a malunga ni a mapwo nikuheha.

⁶ “Chino muchikabwa chikomokeso kuli masalila ja che chifuchi alioze kuli yami hi chikomokeso ko.

^7-8 Mungukapulula atu jami ku yifuchi ku chivumbuko, ni ku chitokelo kuze aatwalile ni kwaahilwisa ku Yerusaleme. Kumaakabwa atu jami, ni yami mungukabwa Zambi yo, mungukaayula ni umwenmwene ni ululi.

⁹ “Hamukenu! Hinwevwa maliji waze akwa munanyi ahanjikile muze asele fundamentu ya zuwo liami.

¹⁰ Muze te kanda achibutula kutunga lie zuwo, niumwe kahashile kufweta atu hanji yimuna mumu ha milimo yo, niumwe wabwile ni uhwimino mumu ha kwoka cha akwa kole jo. Yingushinjika atu alimike ene ni ene.

¹¹ Alioze mungulinga kanawa kuli masalila a vungu lino.

¹² Kumaakakuwa mbuto jo mu uhwimino. Mivinyu yo muyikema mihuko, mavu maakasokesa mbuto, mukukabwa vula munji. Atu ja vungu liami waze maasala ho mungukaawahisa ni yuma yino yeswe.

¹³ Ayuda ni Aisraele, ha mwaka wali yilambala te kaakulishinga ngwo: ‘Lamba lize amwene Ayuda ni Aisraele linuhete kama!’ Alioze yami mungukanulamwina, mba yilambala wano maakalihanjekesa ngwo: ‘Ni yenu, Zambi anuwahise ngwe chize hawahisa Ayuda ni Aisraele!’ Kashika hamukenu, kanda nwivwa woma.”

¹⁴ Mwene Zambi Mukwa Ndundo Jeswe kanambe ngwenyi: “Muze tushakulu twenu angwivwishile ufwatulo, nabatwile ni kwamwesa lamba, chalumwine ko mbunge yami, nachilingile.

¹⁵ Alioze hinabatula kuwahisa akwa Yerusaleme ni Ayuda ha matangwa wano. Kashika kanda nwivwa woma.

¹⁶ Yuma yize chanutamba kulinga yili yino: hanjikenu umwenemwene umwe ni mukwo. Mu yisopelo batulenu ni ululi, mba nubwe mu uhwimino.

¹⁷ Kanda nutakila akwenu yuma yibi. Kanda nulishinga ni kulenya mutu mukwo. Mumu nakuvutwokela mahuza ni uhenge.”

¹⁸ Mwene Zambi Mukwa Ndundo Jeswe yalweza Zakaria maliji wano ngwenyi:

¹⁹ “Kulitwamina kulia ha tukweji wa muchiwana, ni wa muchitano, ni wa muchishimbiali, ni wa muchikumi, muyikalumuka yiwanyino ya chiseke ni ya uwahililo ya Ayuda. Kashika zangenu umwenemwene ni uhwimino.”

²⁰ Mwene Zambi Mukwa Ndundo Jeswe kanambe ngwenyi: “Matangwa maakeza muze atu a ku membo anji maakeza ku Yerusaleme.

²¹ Akwa limbo limwe maakambila akwa limbo likwo ngwo: ‘Tunayi ni kuwayila Mwene Zambi Mukwa Ndundo Jeswe ni kumwita ukonekeno. Tatuyenu!’

²² Atu anji ni mavungu a tachi maakeza ku Yerusaleme ni kuwayila Mwene Zambi Mukwa Ndundo Jeswe ni kumwita ukonekeno.

²³ Ha matangwa waze malunga kumi yilambala maakeza kuli umwe Kayuda nikwamba ngwo: ‘Tunazange kulinunga nenu, mumu hitwevwa ngwo, Zambi kali hamwe ni yenu.’ ”