Zakaria 7 - Mukanda Wa Zambi 1970

Kulitwamina kulia ni mbunge jaali

¹ Ha mwaka wa muchiwana ha tangwa lia muchiwana lia kakweji wa muchilivwa (kakweji wa Kisleve), wa kuyula cha mwanangana Dariuse, Mwene Zambi yangulweza amwe maliji.

² Akwa Betele te haatuma Sharezere ni Regemeleke ni atu jo ku zuwo lia Mwene Zambi Mukwa Ndundo Jeswe alembe hanga Mwene Zambi aawahise,

³ ni kuhula mahako ni akwa munanyi chihula chino ngwo: “Chatutamba kunyongonona ni kulila ni kulitwamina kulia ha kakweji wa muchitano ngwe chize twakulinga ndoo ni musono, mumu akwa kole haanabuzula zuwo lia Zambi, nyi?”

⁴ Mwene Zambi yangulweza maliji wano

⁵ ngwenyi: “Lweza atu a mu chifuchi ni mahako a Zambi ngwe: ‘Muze te nwakulitwamina kulia ni kunenganyana ha kakweji wa muchitano ni wa muchishimbiali ha miaka yino makumi shimbiali, te nwakuchilinga hanga nungulemese, nyi?

⁶ Chibwe muze nwalile ni nwanwine, kunwachilingile ni kuliwahisa yenwene, nyi?’ ”

⁷ Maliji wano akwa munanyi a Zambi atangu aahanjikile nikulita ni maliji a Mwene Zambi muze te Yerusaleme akuyuka ni akuzala ni atu, ni muze te atu anji akutwama mu membo waze ajingilika Yerusaleme, ni mu chifuchi cha ku sude, ni ha mindundena ku chitokelo.

Zambi yatwala Aisraele mu undungo mumu ha uhulia

⁸ Mwene Zambi yalweza Zakaria maliji wano ngwenyi:

⁹ “Ku shakulu nahanyine Shimbi jino kuli atu jami ngwami: ‘Chanutamba kubatula milonga ni ululi, ni kulilweza utu ni keke umwe ni mukwo.

¹⁰ Kanda nubinjisa mapwo waze haanafwisa malunga, ni ana a shiwa, ni yilambala waze atwama mukachi kenu, ni yiswale. Kanda nutakila mukwenu Chuma chibi.’

¹¹ “Alioze atu jami yaakwata pami, yaalituna kungubanjika, yaakalisa mbunge jo,

¹² yijikala ngwe mawe. Nevwile wuli unji mumu te kaasolo kubanjika ku maliji jami waze alongesele akwa munanyi ku shakulu.

¹³ Kaabanjikile ko muze nahanjikile, kashika ni yami chaabanjikile ko muze angulembele.

¹⁴ Naamwangine ngwe fuji ya kangonga mu yifuchi ya yilambala. Mba chifuchi chino chibema yichisala chahululu, niumwe kasalile mo.”