Zakaria 6 - Mukanda Wa Zambi 1970

Usolwelo wa matemba awana

¹ Yingumona Usolwelo ukwo. Chisuho chino yingumona matemba awana waze aneza mukachi ka milundu yaali

² Temba litangu kaanalikoko kuli tuvwalu awana achila, lia muchaali kuli tuvwalu alaa,

³ lia muchitatu kuli tuvwalu atoma, lia muchiwana kuli tuvwalu a yibeka yibeka.

⁴ Mba yinguhula mwe kanganda ka mwilu ngwami: “Aa mwata, matemba wano kuchi analumbunuka?”

⁵ Yangukumbulula ngwenyi: “Jino jili fuji jiwana jize jinakatuka kuli Mwene Zambi wa hashi heswe.”

⁶ Temba lize lia tuvwalu alaa te linatalikisa ku Babilonia ku norde, lize lia tuvwalu atoma linayi ku chitokelo, ni lize lia tuvwalu a yibeka yibeka linatalikisa ku chifuchi cha ku sude.

⁷ Muze tuvwalu a yibeka yibeka haatuhuka, yaazanga kwendesa hashi. Kanganda ka mwilu ngwenyi: “Yeenu, nwendese hashi!” No yaaya.

⁸ Mba kanganda yakololoka kuli yami ngwenyi: “Tuvwalu waze ayile ku Babilonia ku norde haahwimisa ufwatulo wa Mwene Zambi.”

Chipangula mumu hali Yoshua

⁹ Mwene Zambi yangulweza maliji wano

¹⁰ ngwenyi: “Anda yawana yize ahanyine njize Heldai, ni Tobija, ni Jedaya. Mba yako maha Josia mwana wa Zefania. Malunga wano eswe akatukile mu undungo mu chifuchi cha Babilonia.

¹¹ Linga chipangula cha prata ni oru chize ahanyine, uchijike ku mutwe wa mwata wa mahako, Yoshua mwana wa Jehozadake.

¹² Mulweze ngwe, Mwene Zambi Mukwa Ndundo Jeswe kanambe ngwenyi: ‘Lunga yoze akuvuluka ngwo, Mwe Mutango, muukatuluka muma muze atwama, mba makatungulula zuwo liami.

¹³ Mwe iye mwe makalitunga, makatambula uhenya wa mwanangana, makayula atu jami. Umwe hako makamana ku chitwamo chenyi, no maakalinga hamuwika ni uhwimino.’

¹⁴ Che chipangula muchikabwa chiwulukilo mu zuwo lia Mwene Zambi hanga alemese Heldai, ni Tobija, ni Jedaya, ni Josia.”

¹⁵ Atu waze atwama kusuku maakeza ni kukwasa kutungulula zuwo lia Mwene Zambi. Mba muze hiliahwa kutungulula, munukanyingika ngwenu, Mwene Zambi Mukwa Ndundo Jeswe mwe wangutuma kuli yenu. Yuma yino yeswe muyikabwa nyi nwononokena liakulu Shimbi ja Mwene Zambi, Zambi yenu.