Zakaria 5 - Mukanda Wa Zambi 1970

Usolwelo wa chivungo cha mukanda

¹ Yingutala nawa, yingumona chivungo cha mukanda chinatelumioka mu tetela.

² Kanganda ka mwilu yamuhula ngwenyi: “Yika unamono?” Yingumukumbulula ngwami: “Ngunamono chivungo cha mukanda chinatelumioka mu tetela; Usuhwe wacho metro livwa, unene wacho metro jiwana ni Chipinji.”

³ Mba yangwamba ngwenyi: “Ha mukanda uze hanasonewa Shingo lize mulitanda mu chifuchi cheswe. Ku sali limwe lia chivungo kunasonewa ngwo, mweswawo meya, maamuhuma mu chifuchi; ku sali likwo linasonewa ngwo, mweswawo malishinga ni mahuza, maamuhuma.

⁴ Mwene Zambi Mukwa Ndundo Jeswe kanambe ngwenyi: ‘Mungumwangina Shingo lize kweswe; mulikanjila mu zuwo lia mwiji mweswe ni lia yoze wakulishinga ni mahuza. Mulikanjila mu mazuwo jo ni kwenyeka mo.’ ”

Usolwelo wa pwo yoze unatwama mu chisoka

⁵ Kanganda ka mwilu yasoloka nawa kuli yami, yamba ngwenyi: “Tala! Chuma chikwo chineza!”

⁶ Yinguhula ngwami: “Chuma chika?” Iye ngwenyi: “Chili chisoka, chinalumbununa ngwo, shili ya akwa chifuchi eswe.”

⁷ Che chisoka yichibwa ni chifuko cha shumbu. Muze te ngunatale, chifuko yichazuluka, kumana umwe pwo unatwama mo!

⁸ Kanganda ka mwilu yamba ngwenyi: “Pwo yono kanalumbununa ungulungulu.” Mba yamukona mu chisoka, yaafuka ho che chifuko.

⁹ Yingutala, yingumona mapwo aali kaanatelumioka mu tetela kunyima liami ni mapulwa a tachi ngwe a chitokola. Yaazundula che chisoka, yaahumuka nacho.

¹⁰ Yinguhula mwe kanganda ngwami: “Kulihi anachitwala?”

¹¹ Yangukumbululangwenyi: “Kaanachitwala ku chifuchi cha Babilonia, kwenako maakachitungila zuwo liacho. Muze lie zuwo mulikahwa, maakasa mo che chisoka hanga achikombelele.”