Zakaria 4 - Mukanda Wa Zambi 1970

Usolwelo wa chikwachilo cha ndeya

¹ Kanganda ka mwilu yoze te unahanjika ni yami yeza nawa, yangukasumuna ngwe mu tulo nguli.

² Yanguhula ngwenyi: “Yika unamono?” Yingukumbulula ngwami: “Ngunamono chikwachilo cha ndeya chakulinga ni oru. Helu chili ni musenge wa kusa maji. He ha chikwachilo hali ndeya shimbiali, ndeya ni ndeya yiibwa ni mikungo shimbiali ha kusa mo ngoji.

³ Ku sali lia che chikwachilo cha ndeya kuli mitondo yaali olive, umuwika sali, umuwika sali.”

⁴ Mba yinguhula mwe kanganda ngwami: “A mwata, ye yuma yino kuchi yinalumbunuka?”

⁵ Yanguhula ngwenyi: “Kuma kuwanyingikine, nyi?”

Chilakenyo cha Zambi kuli Zerubabele

⁶ Kanganda ka mwilu yangwaha maliji wano a kuli Mwene Zambi ha kulweza Zerubabele ngwenyi: “Kumuukumba, alioze hi ku tachi ja tujita ko, hanji ja yena mwene, alioze ku tachi ja mwiku wami.

⁷ Yikwiko yinene ngwe milundu muyijimuka kulutwe lie. Kumuutungulula zuwo lia Zambi. Mba muze muukanangika liwe liakusula, atu kumaakakololoka ngwo: ‘Hoho nawa! Hoho nawa!’ ”

⁸ Mwene Zambi yaweza maliji akwoo

⁹ ngwenyi: “Zerubabele hasa fundamentu ya zuwo liami, kumakalimanununa. Mba atu maakanyingika ngwo, kuma yami Mwene Zambi nakutumine kuli ayo.

^10a Kaanevu chinyengo mumu milime yinayi kulutwe makoke makoke. Alioze maakamona ngwo, Zerubabele kanalikoleza lume ni kutunga zuwo liami, mba maakawahilila.” Yingukumbulula ngwami: “Ka mwata, Chanyingikine.”

^10b Iye ngwenyi: “Ndeya shimbiali jili meso shimbiali a Mwene Zambi waze akumona mbango jeswe ja hashi.”

¹¹ Mba yingumuhula ngwami: “Mitondo yaali ya olive, ku sali ni sali lia chikwachilo cha ndeya, kuchi yinalumbunuka?

¹² Kuchi chinalumbunuka mitango yaali ya olive yize yili ku sali ni sali lia mihembo yaali ya oru kuze kunatuhukila maji a olive?”

¹³ Yanguhula ngwenyi: “Kuma kuwanyingikine, nyi?” Ngwami: “Ka mwata, Chanyingikine.”

¹⁴ Mba yangwamba ngwenyi: “Wano kaali malunga aali Waze Zambi atongwele ni awayishile maji hanga amulingile, iye Mwene Zambi wa hashi heswe.”