Zakaria 3 - Mukanda Wa Zambi 1970

Usolwelo: mwata wa mahako

¹ Mu Usolwelo ukwo Mwene Zambi yangulweza Yoshua, mwata wa mahako a Zambi kanamana kulutwe lia kanganda ka Mwene Zambi. Kwenako ku chindume cha mwe Yoshua, Sakwonga kanamana amusume mulonga.

² Mwe kanganda ka Mwene Zambi, yambila Sakwonga ngwenyi: “Sakwonga, Mwene Zambi akukande! Mwene Zambi yoze wakuzanga Yerusaleme akukande. Mumu mutu yono kali ngwe mutondo uze haachangumuna mu kahia.”

³ Yoshua te kanamana kulutwe lia kanganda ka mwilu, kanazala mahina a luchisa.

⁴ Kanganda ka mwilu yambila waze te anamana ko ngwenyi: “Muzulenu mahina a luchisa.” Mba yambila Yoshua ngwenyi: “Hinakuchiza shili ye, mungukujika mahina aha.”

⁵ Mba yambila tuvumbi hanga amuse kapusa kabema ha mutwe. No yaachilinga, ni yaamujika mahina aha. Kanganda ka mwilu kwenako te kanamana.

⁶ Mwe kanganda ka mwilu yalweza Yoshua maliji waze

⁷ Mwene Zambi Mukwa Ndundo Jeswe amwambile ngwenyi: “Nyi wononoka ku Shimbi jami ni kulinga milimo yize hingunakutongwela, mba muulinduluka mu milimo ya kuyula zuwo liami ni e maaze jalio, mungwivwa kulemba che ngwe chize nakwivwa yilemba ya tunganda twa mwilu waze anamana kulutwe liami.

⁸ Yena Yoshua, mwata wa mahako, banjika! Yenu mahako waze nwalinga nenyi, waze nuli chilayi cha yiwape yize muyiza ho, banjikenu! Mungunusolwela kavumbi kami yoze akuvuluka ngwo, Mwe Mutango!

⁹ Kulutwe lia Yoshua ngunase ko limwe liwe lia mambango shimbiali. Mungusoneka ho amwe maliji; ha tangwa limuwika lume mungukachiza shili ya akwa chifuchi chino.

¹⁰ Muze lie tangwa hilieza, mutu mweswe wa kuli yenu makalakenya mwenyembo wenyi eze hanga awahilile nenyi mu uhwimino, ni kutwama mushi lia mitondo yenyi ya vinyu ni ya mikuyu.”