Zakaria 2 - Mukanda Wa Zambi 1970

Usolwelo wa lwoji wa kweseka nenyi

¹ Mu Usolwelo ukwo yingumona umwe lunga ni lwoji wa kweseka nenyi mu kwoko lienyi.

² Yingumuhula ngwami: “Kuli unayi?” Iye ngwenyi: “Ngunayi ni kweseka Yerusaleme, ngumone Usuhwe ni unene wenyi.”

³ Mba yingumona mwe kanganda yoze te unahanjika ni yami kanakundama, ni kanganda mukwo yeza atakane nenyi.

⁴ Mutangu yambila musula ngwenyi: “Zomboka ulweze mukweze yoze uli ni lwoji wa kweseka nenyi ngwe: ‘Mu Yerusaleme kumumubwa atu ni ngombe anji kuhiana, kashika kechi kuhasa kubwa nawa ni chipanga.

⁵ Mwene Zambi halakenya ngwenyi, iye mwene makabwa chipanga cha kahia chize chinajingilika limbo ni kulifunga, iye mwene matwama mo mu uhenya wenyi weswe.’ ”

Mwene Zambi yatambika waze abwile mu undungo

^6-7 Mwene Zambi yambila atu jenyi ngwenyi: “Hingunanumwangina mu yifuchi yeswe sali ni sali. Alioze haliabwila, yenu njize, katukenu mu Babilonia, nuhiluke ku Yerusaleme.

⁸ Mweswawo manulamba, kalamba Chuma chami chilemu chahiana.” Kashika Mwene Zambi Mukwa Ndundo Jeswe yangutuma ni maliji wano mumu hali mavungu waze abubile yuma ya atu jenyi ngwenyi:

⁹ “Mwene Zambi iye mwene makahamika ni yenu, ni atu waze abwile tuvumbi twenu maakabuba yuma yenu.” Muze yuma yino hiyabwa, atu eswe maakanayingika ngwo, kuma Mwene Zambi Mukwa Ndundo Jeswe hangutuma.

¹⁰ Mwene Zambi yamba ngwenyi: “Yenu akwa Yerusaleme, imbenu ni kuwahilila! Nguneza ni kutwama mukachi kenu!”

¹¹ Mavungu anji maakalinunga ni Mwene Zambi ha tangwa lize, ni maakabwa atu jenyi. Neye makatwama mukachi kenu. Mba munukanyingika ngwenu, kuma iye mwe wangutuma kuli yenu.

¹² Ayuda maakabwa nawa atu alemu a mbala a Mwene Zambi mu chifuchi chenyi cha chijila, ni Yerusaleme makabwa limbo lize azanga kuhiana membo akwo eswe.

¹³ Atu eswe holenu kuluu ku meso ja Mwene Zambi, mumu kanakatuka kuma kwenyi kwa chijila, kaneza.