Zakaria 13 - Mukanda Wa Zambi 1970

¹ Mwene Zambi Mukwa Ndundo Jeswe kanambe ngwenyi: “Ha matangwa waze mungukajikula shima lia meya ngubemese vungu lia David ni akwa Yerusaleme ku shili yo ni ku mahamba jo.

² Ha matangwa waze mungukachiza majina ja mahamba mu chifuchi, niumwe kechi keewuluka nawa. Mungukahuma eswe waze akuzanga kulipwisa akwa munanyi ni akuzanga kukombelela mahamba.

³ Nyi umwe mutu makazanga kuhanjika munanyi, tato ni naye maakamwamba ngwo, chamutamba kufwa, mumu hamba ngwenyi kanahanjika maliji a Zambi alioze heseka kuhanjika mahuza. Muze makahanjika munanyi, tato ni naye maakamushiha ni poko.

⁴ Muze matangwa waze heeza, mukwa munanyi niumwe makalengumuka ni Usolwelo wenyi, hanji kwimbulula mukwa munanyi, chibwe kuzala mahina awonawona ja mukwa munanyi hanga onge atu.

⁵ Alioze makamba ngwenyi: ‘Hinguli mukwa munanyi ko, nguli kwami njimi, nalimine minda mu mwono wami weswe.’

⁶ Mba nyi umwe makamuhula ngwenyi: ‘Yimbandwa yize mu moko je yaka?’ iye makakumbulula ngwenyi: ‘Tusendo twami angulemekene yo.’ ”

Shimbi ya kushiha kafunga ka Zambi

⁷ Mwene Zambi Mukwa Ndundo Jeswe kanambe ngwenyi: “Mukwale katuka, limike ni kafunga yoze wakungulingila milimo! Mushihe, mba mapanga maamwangana. Mungukalimika ni atu jami,

⁸ mu chifuchi cheswe, mba mbunga jaali a ku mbunga jitatu maakafwa.

⁹ Mbunga ya muchitatu yize muyikasala mungukaabemesa mu kahia. Mungukaabemesa ngwe oru yize haabemesa mu kahia. Mba maakalemba kuli yami, ni yami mungukaakumbulula. Mungukaamba ngwami, nuli atu jami. No maakashikisa shili yo nikwamba ngwo, nguli Zambi yo.”