Zakaria 12 - Mukanda Wa Zambi 1970

Mwene Zambi makalamwina Yerusaleme

¹ Mwene Zambi yalongesa maliji wano hakutwala kuli Aisraele. Kali Mwene Zambi yoze wazazulwile lilu, yoze watangile hashi, yoze wapwishile mutu mukwa mwono. Kanambe ngwenyi:

² “Mungukapwisa Yerusaleme ngwe musenge wa vinyu. Mavungu waze amujingilika maakaunwa, mba maakatalinga ngwe atu waze haazengewa. Muze maakaseleka Yerusaleme, maakaseleka nawa membo eswe akwo a mu Yuda.

³ Alioze ha matangwa waze, mungukapwisa Yerusaleme ngwe liwe lilemu. Vungu heswe lize makeseka kulizundula, makalemana. Mavungu eswe a hashi maakalikata akase nenyi jita.

⁴ Ha matangwa waze mungukevwisa tuvwalu two eswe mwongo; eswe waze akwendela ho mungukaazalwisa. Mungukafunga Ayuda, alioze tuvwalu twa akwa kole jo mungukaapupuchisa meso.

⁵ Mba majimo ja Yuda maakalihanjekesa ngwo: ‘Mwene Zambi Mukwa Ndundo Jeswe hatakamisa atu jenyi waze atwama mu Yerusaleme.’

⁶ “Ha matangwa waze mungukapwisa majimo ja Yuda ngwe kahia kaze mukalekwoka mu usaki hanji mu munda wa mbuto yize hiyahia. Maakonona mavungu eswe waze aajingilika. Akwa Yerusaleme maakatwama mu uhwimino mu limbo.

⁷ “Yami, Mwene Zambi, hatangu mungukakwasa tujita twa Yuda kukumba, hanga chichi kalemesa vungu lia David ni akwa Yerusaleme kuhiana Ayuda akwo.

⁸ Ha matangwa waze Mwene Zambi makafunga akwa Yerusaleme. Mba chibwe alelu kuhiana mukachi ko maakabwa ni tachi ngwe chize abwile David. Vungu lia David maakasongwela ngwe kanganda ka Mwene Zambi, ngwe Zambi iye mwene.

⁹ Ha matangwa waze mungukonona mavungu eswe waze maakeseka kwasa jita ni Yerusaleme.

¹⁰ “Vungu lie David ni akwa Yerusaleme akwo, mungukaaha mbunge ya keke ni zango ya kulemba. Kumaakatala yoze atuwile kunga, yoze ashihile. Kumaakalinyenga hali iye ngwe waze analinyenge hali mwana wa wika. Maakamulila mbimbi chikolo, ngwe waze haatokesa mwano mutangu wa lunga.

¹¹ Ha matangwa waze maakalila mbimbi mu Yerusaleme ngwe chize atu mu chana cha Megido akulila Hadade Rimone.

^12-14 Jiko ni jiko mu chifuchi makanenganyana ayo ene: akwa jiko lia David, ni akwa Levi, ni akwa Shimei, ni majiko eswe akwo. Jiko ni jiko makanenganyana ayo ene, malunga ni malunga, mapwo ni mapwo.”