Zakaria 11 - Mukanda Wa Zambi 1970

Mwene Zambi makakumba akwa kuyula yiswii

¹ Yena Libano, azulula ku yikolo ye, hanga kahia koche mitondo ye sedru!

² Yenu mitondo Shipre, lilenu mbimbi, mumu misedru hayinungwona, mitondo yize ya uhenya haayenyeka! Yenu mitondo shene ya Bashane, lilenu mbimbi, usaki uze wajika haaupakwila hashi!

³ Akwa kuyula kaanalili mbimbi mumu uhenya wo hiwahwa! Banjikenu kuhiohia cha tambwe mumu mishitu yo ku mbumbulu ya Yordau haayipakula.

Tufunga aali

⁴ Mwene Zambi, Zambi yami, yangwamba ngwenyi: “Bwako ngwe kafunga ka mapanga waze haanaanyongena kufwa.

⁵ Akwa kulanda kaakushiha e mapanga, hindu atu waze keeshi kwamwesa lamba. Kaakulanjisa yifwo yo nikwamba ngwo: ‘Mwene Zambi afumane! Hitwabwa pichi!’ Chibwe e tufunga two keeshi kweevwila keke.”

⁶ (Mwene Zambi yamba ngwenyi: “Chichi kevwila nawa akwa hashi keke. Yami mwene mungukakunjika atu eswe mu moko ja akwa kuyula jo. Akwa kuyula waze maakafwenya he hashi, ni yami chichi kalamwina ho.”)

⁷ Atu waze te akulanda ni kulanjisa mapanga yaangwaha milimo, mba yingubwa kafunga ka mapanga waze te anambe kushiha. Yingwanda kanda jaali: umuwika yingumuluka ngwami: “Vumbi,” ni mukwo ngwami: “Kununga.” Mba yingufunga e mapanga.

⁸ Ha kakweji umuwika nachiijile tufunga akwo atatu, mumu te kaakunguvutwokela.

⁹ Mba yingwambila mapanga ngwami: “Hichichi kubwa nawa kafunga kenu. Waze chaatamba kufwa, afwe kwo; waze chaatamba kwonona, onoone kwo. Waze haasala ho maalionona ene ni ene.”

¹⁰ Mba yingwanda lukanda yoze nalukile ngwami “Vumbi,” yingumumakuna hanga ngushihe Usendo uze Mwene Zambi akolesele ni mavungu eswe.

¹¹ Chenacho Usendo wafwile ha tangwa lizeliene. Waze alanjile ni alanjishile e mapanga yaangumona, yaanyingika ngwo, Mwene Zambi kanahanjika hakutwala ku yeswe yize te nakulinga.

¹² Yingwaambila ngwami: “Nyi nunazange, ngwehenu fweto yami. Alioze nyi ka, yifungenu.” Mba yaangufweta mbongo ja prata makumi atatu.

¹³ Mwene Zambi yangwamba ngwenyi: “Mbongo je jise mu mushete mu zuwo lia Zambi.” Kashika nanjile je mbongo ja prata makumi atatu, ye ndando yinji yize angunyongenene, yingujisa mu mushete mu zuwo lia Zambi.

¹⁴ Mba yingumakuna lukanda wami wa muchaali, yoze te nakuvuluka ngwami “Kununga,” mba kununga cha Ayuda ni Aisraele yichifwa.

¹⁵ Mba Mwene Zambi yangwamba ngwenyi: “Bwako nawa ngwe kafunga, chisuho chino kafunga wamokomoko.

¹⁶ Hinasa kafunga afunge mapanga jami, alioze keshi kufunga mapanga waze anambe kushiha, hanji kufupa waze haatoka, chibwe kuwuka waze haalemana, chibwe kulisa waze haasala ni mwono. Alioze malia yifwo ya waze ali ni maji ni kuzunwona sende jo.

¹⁷ Alioze lamba kuli kafunga yoze wamokomoko! Hehuka mapanga jenyi. Jita mujikazeyesa tachi jenyi liakulu. Kwoko lienyi lia chindume mulikasosewa, ni liso lienyi lia chindume mulikapuputa.”