Zakaria 10 - Mukanda Wa Zambi 1970

Mwene Zambi yalakenya kulamwina atu jenyi

¹ Mwitenu Mwene Zambi anwehe vula musazu ha mwaka. Mwene Zambi mwe wakutuma malelwa a vula, mwe wakutatwishila atu eswe mwambu wa wisu.

² Atu kaakuhula mahamba ni tahi, alioze kumbululo lio liakubwa lia mahuza kanda liamokomoko. Amwe kaakulumbununa yilota, alioze kaakuchilinga hanga apiangule atu. Kulembejeka cho chili chamokomoko. Kashika atu kaakwendangana ngwe mapanga waze keeshi kafunga. Kaali mu lamba mumu keeshi tetekeli.

³ Mwene Zambi kanambe ngwenyi: “Yilambala waze akuyula atu jami nguneevwila ufwatulo, mungukaamwesa lamba. Ayuda kaali niami, yami, Mwene Zambi Mukwa Ndundo Jeswe, mungukaafunga. Maakabwa ngwe tuvwalu twami a tachi a jita.

⁴ Mukachi ko mumukatuhuka akwa kuyula, ni tetekeli, ni miata a tujita waze maakayula atu jami.

⁵ Ayuda makabwa akwa kukumba ngwe tujita waze analiachila akwa kole jo mu malowa a mu majila. Kumaakasa jita, kumaakakumba chibwe waze akwendela ha tuvwalu, mumu Mwene Zambi makabwa hamwe no.

⁶ “Mungukatakamisa Ayuda; mungukalamwina Aisraele. Mungukeevwila keke; mungukaahilwisa eswe ku mahio. Kumaakabwa ngwe cheehukile ko nichimwe. Yami nguli Mwene Zambi, Zambi yo; mungukakumbulula yilemba yo.

⁷ Aisraele maakatakama ngwe tujita a tachi, maakabwa ni chiseke ngwe waze haanwa vinyu. Ana jo kumaakewuluka kukumba chino, kumaakawahilila ha chize Mwene Zambi halinga.

⁸ “Mungukatambika atu jami ni kwakunga hamuwika. Mungukaalamwina, mungukookesa ngwe chize abwile hatangu.

⁹ Chibwe naamwanginyine mukachi ka mavungu, hindu kumaakangwiwuluka, chibwe kusuku kuze atwama. Ayo ni e ana jo kumaakatwama ni mwono, kumaakahiluka eswe hamuwika ku mahio.

¹⁰ Chize ku Egiptu ndoo ku Asuria mungukaahilwisa ku mahio ni kwatungisa mu chifuchi cho. Mungukaatungisa nawa mu Gileade ni mu Libano; chifuchi cheswe muchikazala ni atu.

¹¹ Muze maakazauka kalunga lwiji wo wa lamba yami, Mwene Zambi, mungukalamba ye miavu, mba majinga ja Nile maakoma. Aasuria, akwa kulengumuka, mungukaakehesa, yitakame mu Egiptu, tachi jo kumujikahwa.

¹² Mungukatakamisa atu jami; kumaakanguwayila ni kungwononokena.” Mwene Zambi hachamba.