Zakaria 1 - Mukanda Wa Zambi 1970

Mwene Zambi yatambika atu jenyi ahiluke kuli iye

¹ Ha mwaka wa muchaali ha kakweji wa muchinake wa kuyula cha Dariuse mwanangana wa Persia, Mwene Zambi yalweza maliji wano kuli mukwa munanyi Zakaria, mwana wa Berekia mujikulu wa Ido.

² Yamwambila alweze atu ngwenyi: “Yami, Mwene Zambi, natenukinyine tushakulu twenu kuhiana,

³ alioze haliabwila ngunanwambe ngwami: Hilukenu kuli yami, mba ni yami munguhiluka kuli yenu.

⁴ Kanda nubwa ngwe tushakulu twenu. Mumu mwaka wali akwa munanyi te kaakwalongesa maliji jami, yaalweza ngwo: ‘Kanda nubwa yingulungulu, kanda nuvulumuna.’ Alioze kaangubanjikile ko, kaangwononokenene ko.

⁵ Tushakulu twenu ni akwa munanyi haanafu kulu.

⁶ Nahanyine Shimbi jami ni maliji a kukanyamisa kuli tuvumbi twami akwa munanyi aalweze tushakulu twenu. Alioze yaalelesa, kashika yaamona lamba. Hohene yaalumuka ku mbunge, yaatayiza ngwo, yami Mwene Zambi Mukwa Ndundo Jeswe naamwesene lamba nikulita ni yitanga yo, ngwe chize nabatwile kulu.”

Usolwelo wa tuvwalu

⁷ Ha mwaka wa muchaali wa kuyula cha Dariuse, ha tangwa lia makumi aali a kakweji wa kumi ni umuwika (kakweji wa Shebate), Mwene Zambi yangulweza maliji ha ufuku mu Usolwelo.

⁸ Yingumona kanganda ka Mwene Zambi kanende ha kavwalu muchila, yamana mukachi ka mitondo mirtre mu chikulo. Kunyima lienyi yikubwa tuvwalu akwo achila, ni ayibeka yibeka, ni atoma.

⁹ Yingumuhula ngwami: “A mwata, tuvwalu wano kuchi analumbunuka?” Yangukumbulula ngwenyi: “Mungukulweza chize analumbunuka.

¹⁰ Mwene Zambi waatuma hanga endese chifuchi.”

¹¹ No yaalweza kanganda ka Mwene Zambi ngwo: “Hitwendesa hashi heswe, kuwana atu eswe haabwa ni mulekeleke, haazeya.”

¹² Hohene kanganda ka mwilu yamba ngwenyi: “Mwene Zambi Mukwa Ndundo Jeswe, hiunatenukina Yerusaleme ni e membo ja Yuda ha miaka makumi shimbiali. Mba miaka yingahi yasala ko ha kweevwila kama keke?”

¹³ Neye yakumbulula mwe kanganda ni maliji a kuhuhumiona.

¹⁴ Kanganda neye yangulweza ngumwange sango jize Mwene Zambi Mukwa Ndundo Jeswe ambile ngwenyi: “Nguli ni ukwa unji hakutwala ku Yerusaleme, limbo liami lia chijila,

¹⁵ alioze mavungu waze anatwama kanawa mu uhwimino ngunaatenukina. Mumu muze nalihumikijine ni atu jami, e mavungu yaahungumiona kuhiana.

¹⁶ Kashika hinahiluka ku Yerusaleme hanga ngweevwile keke. Zuwo liami mungulilulika, ni lie limbo mungulitungulula.”

¹⁷ Mwe kanganda yangwamba nawa ngumwange sango ngwenyi: “Mwene Zambi Mukwa Ndundo Jeswe kanambe ngwenyi, membo jenyi kumaakayuka nawa. Neye makakwasa Yerusaleme nawa ni kuutayiza kubwa limbo lienyi mwene.”

Usolwelo wa mbinga

¹⁸ Mu Usolwelo ukwo yingumona mbinga jiwana ja ngombe.

¹⁹ Yinguhula kanganda yoze te unahanjika ni yami ngwami: “Mbinga jino kuchi jinalumbunuka?” Yangukumbulula ngwenyi: “Mbinga jino jinalumbununa mavungu waze amwangine mu Yuda, ni Israele, ni Yerusaleme.”

²⁰ Hohene Mwene Zambi yangulweza fuli awana ni mieto.

²¹ Yinguhula ngwami: “Atu wano yika aneza ni kulinga?” Iye ngwenyi: “Kaaneza ni kuvwisa mwongo ni kukumba mavungu waze afwenyene chifuchi cha Yuda ni kumwanga atu jamo.”