Yuda 1 - Mukanda Wa Zambi 1970

Kumeneka

¹ Yami Yuda, kavumbi ka Yesu Kristu, kanda mwanakwo ya Tiangu (Jake). Ngunanumeneka, yenu waze Tata Zambi atongwele ni akuzanga, waze Yesu Kristu akufunga.

² Zambi anuvwile keke, anwehe uhwimino, anulweze zango.

Alongeshi a mahuza

³ Akwetu, nasele tachi kuhiana kunusonekena hakutwala ku ulamwino uze atulamwinyine yetu eswe. Alioze haliabwila ngunamono ngwe chinalite kunusonekena ha kunutakamisa mu kulitachika chikolo ha ufulielo uze Zambi atuhele yetu akwa Kristu chisuho chimuwika ha miaka yeswe.

⁴ Mumu amwe atu abi aliombele ni kunjila mukachi ketu, alioze te kutwanyingikine ngwetu, haananjila. Kaakwalumuna liji liakutwala ku utu wa Zambi yetu hanga alisambise ku utanji wo. Kaakwehuka Yesu Kristu, Mwata wetu umuwika, kanda Mwene wetu. Mukanda wa Zambi hiunahanjika munanyi shimbu kanda ngwo, maakamona lamba, ni haalimona kulu.

⁵ Chibwe nunanyingika yuma yino kanawa, ngunazange nwiwuluke chize Mwene Zambi alamwinyine Aisraele mu chifuchi cha Egiptu, alioze kulutwe yashiha waze kaafulielele ko.

⁶ Iwulukenu tunganda a mwilu waze kaawahililile ko ni chiyulo chize ahele Zambi, alioze yeehuka muma lio mwakutwama. Zambi yaanyasa hashi mu milima, yaakasa ni ngoji ja utale ku miaka yeswe ndoo ku Tangwa linene lize makaabatwila.

⁷ Iwulukenu chize alingile akwa Sodome ni akwa Gomora ni yihunda yakusulangana, chimuwika nawa ni chize alingile tunganda a mwilu. Yaalinga utanji, yaabwa ni ndako yibi ya uutu. Kaali mu lamba lia kahia ka miaka yeswe, chilweze chize chakutukanyamisa yetu eswe.

⁸ Atu waze aliombele mukachi ketu, kaakulinga nawa chizechene. Yilota yize akulota yakwaha manyonga ha kuvulumwisa mijimba yo ene. Kaakusaula chiyulo cha Zambi, kaakushililika tunganda a mwilu alemu.

⁹ Chibwe Mikele, kanganda wa lutwe wa mwilu, muze alihamikine ni Sakwonga hakutwala ku mujimba wa Mose, kahamukine ko kumushililika, alioze yamba ngwenyi: “Mwene Zambi akukande!”

¹⁰ Alioze atu waze kaakushililika yize kaayinyingikine ko. Yuma yize ayo akulinga kuyishi ni kunyonga, ngwe chize akulinga tushitu, yenayo yakwashiha.

¹¹ Lamba lio! Kaakukaula jila ya Kene, kaakulihana ku ndako yibi mumu ha lwahu wa mbongo, ngwe chize alingile Balame. Hanaanongo mumu ahamikine ngwe chize alingile Kora.

¹² Muze yenu akwa Kristu nwakulia ku yiteleka yenu ya zango, atu wano kaali ngwe yibeka muze akulia ni kunwa kuhiana, keeshi sonyi. Kaakulinyonga ayo ene. Kaali ngwe malelwa waze akuhungumuka ni fuji, alioze keeshi kunoka vula. Kaali ngwe mitondo yize kuyishi kwima mihuko chibwe tangwa lia mihuko hiliaheta, mitondo yize hiyinatangumuka, yakuma liakulu.

¹³ Kaali ngwe miavu ya mu kalunga lwiji. Yibi yize akulinga, yili ngwe fulufulu lia ha miavu. Kaali ngwe matongonoshi waze akupianguka, Zambi hanaalulikila muma mwa milima yahiana ya miaka yeswe.

¹⁴ Kashakulu ketu, Enoke, wa Chisemuko cha muchishimbiali chize kuli Samutu, yahanga kwambulula shimbu kanda hakutwala kuli ayo ngwenyi: “Achivwenu, Mwene makeza hamwe ni yizavu yinji ya akwa kulinanga jenyi a mwilu,

¹⁵ ha kubatwila eswe, ni kuhisa yitanganyanyi eswe mumu ha yitanga yo yibi yize te akulinga ni mumu ha maliji abi waze te akumushililika no.”

¹⁶ Atu waze kaakulinyenyeta ni kubihilila matangwa eswe. Kaakulinga nikulita ni usolo wo ubi. Kaakuhanjika maliji a kulengumuka, kaakuhuhumiona atu akwo ha kwalembejeka.

Kukanyamisa ni kushinjila

¹⁷ Alioze yenu akwetu iwulukenu maliji waze ahanjikile tunganda twa Mwene wetu Yesu Kristu hatangu.

¹⁸ Yaanwamba ngwo: “Ha matangwa akusula, akwa kukekuna maakasoloka waze maakalinga nikulita ni usolo wo ubi.”

¹⁹ Enoo akuhandununa atu. Ndako yo ya uutu yakwayula, hi Mwiku wa Zambi ko.

²⁰ Alioze yenu, akwetu, takamenu mu ufulielo wenu wa kulinanga, lembenu ni tachi ja Mwiku wa Linanga,

²¹ Lifungenu mu zango lia Zambi muze nunashimbwila Mwene wetu Yesu Kristu, yoze manupwisa ni mwono wa miaka yeswe ku keke yenyi.

²² Evwilenu keke akwa kuyambashana.

²³ Achangumunenu ku kahia ha kwalamwina. Ni akwo evwilenu keke nawa, hamwe ni woma. Alioze chanutamba kubihilila mahina jo a luchiza, mahina jo waze haanalichisa ni usolo wo ubi.

Kuwahisa

^24-25 Mu jina lia Mwene wetu Yesu Kristu, uhenya, ni ulamba, ni ndundo, ni yiyulo ya Zambi yisoloke, chize ku miaka yize hiyabalika, ni musono uno, ndoo ku miaka yeswe! Zambi, Chilamwina chetu, kali umuwika lume. Iye mahasa kunufunga hanga kunuchi kalimbuka; mahasa kunusolola kunushi chibeka ni uwahililo kuhiana mu uhenya wenyi. Chibwe kama Chenacho.