Yoshua 9 - Mukanda Wa Zambi 1970

Akwa Gibeone yoonga Yoshua

¹ Kukumba cha Aisraele yaachinyingika kuli mianangana eswe a ku sali lia chitokelo cha Yordau: ku milundu, ni ku mikandu, ni mu yana yeswe ndoo ku kalunga lwiji Mediterane, ni ku norde ndoo ku Libano. Waze achivwile abwile mianangana ja Ahite, ni Aamore, ni Akanana, ni Aperize, ni Ahive, ni Ajebuse.

² Eswe yaalichinga ni kulimika ni Yoshua ni Aisraele.

³ Alioze akwa Gibeone, enoo Ahive, yeevwa chize Yoshua alingile ku Yeriku ni ku Ayi,

⁴ mba yaalulika ni kumwonga. Yaanda yimwe yakulia yikulu, yaayisa mu tuku jikulu, yaayikashila ha yimbulu hamwe ni yikashi yikulu ya vinyu.

⁵ Yaazala sapato jize te hijafwa, ni yibuzu ya mahina. Yakulia yo te hiyinomu chau, ni hiyinakwachika mbundu.

⁶ Yaaya ku musumba ku Gilgale, yaambila Yoshua ni malunga Aisraele ngwo: “Ku chifuchi kusuku tunakatuka. Tunazange kukolesa Usendo ni yenu.”

⁷ Alioze malunga ja Aisraele yaahula ngwo: “Ngwe kuchi mutukolesa Usendo ni yenu? Hanji hakamwihi nunakatuka.”

⁸ No yaakumbulula Yoshua ngwo: “Tuli ngamba jenu.” Yoshua yaahula ngwenyi: “Nuli aya? Kulihi nunakatuka?”

⁹ Mba yaamukumbulula ngwo: “Yetu ngamba jenu ku chifuchi kusuku tunakatuka, mumu hitunevu hakutwala kuli Mwene Zambi, Zambi yenu. Hitunevu hakutwala ku yuma yeswe yize alingile mu chifuchi cha Egiptu,

¹⁰ ni chize alingile kuli mianangana aali ja Amore a ku sali lia chivumbuko lia Yordau, mwanangana Sihone wa ku limbo lia Heshbone, ni mwanangana Oge wa ku limbo lia Ashtarote mu chifuchi cha Bashane.

¹¹ Miata jetu ni akwa chifuchi chetu eswe yaatulweza tululike yimwe yakulia mumu ha wenyi wetu, twize nikulitakana ni yenu. Yaatwamba tunulweze ngwo: ‘Tuli ngamba jenu, tulikolesenu nenu Usendo.’

¹² Achitalenu mbolo jetu. Muze twakatukile najo ku mahietu, ni kwiza ni kulitakana ni yenu, te jinavumu. Alioze talenu! Haliabwila hijoma chau ni hijakwachika mbundu.

¹³ Muze twalongezele tuku ja vinyu te jichili jaha. Alioze talenu! Hijachanwoka. Mahina jetu ni sapato jetu hijatanwoka mume ha jila yisuku.”

¹⁴ Malunga ja Aisraele yaalia yakulia ya akwa Gibeone, alioze kaahulile ko Mwene Zambi.

¹⁵ Yoshua yakolesa no Usendo, yaatayiza kutwama ni mwono. Makulwana ja mbunga ya Aisraele yaalishinga afunge Usendo.

¹⁶ Kulutwe lia matangwa atatu, muze haakolesa kulu Usendo, Aisraele yeevwa ngwo, atu waze hakamwihi atwama

¹⁷ Aisraele yaabomba matangwa aali mo jila, mukwacha yaaheta ku membo ja atu waze: Gibeone, ni Shefira, ni Berote, ni Kiriate, ni Jerimi.

¹⁸ Alioze Aisraele kaahashile ko kwashiha, mumu miata jo te haanalishingi no mu jina lia Mwene Zambi, Zambi ya Aisraele. Aisraele eswe yaalinyenyeta hali makulwana hakutwala ku Chuma chino.

¹⁹ Alioze miata yaakumbulula ngwo: “Hitunalishingi mu jina lia Mwene Zambi, Zambi ya Aisraele. Haliabwila kutwahashile kwalinga nichimwe.

²⁰ Chatamba kweecha atwame ni mwono mumu ha chilakenyo chetu. Nyi ka, Zambi matumwesa lamba.

²¹ Tweechenu atwame ni mwono, alioze maabwa akwa kutuchayila kunyi ni kututahila meya.” Chenacho che alulikile miata.

²² Yoshua yatambika akwa Gibeone, yaahula ngwenyi: “Mumu yika nwatwongele nikwamba ngwenu, kusuku twatwama, alioze kuma hakamwihi nuli?

²³ Ha Chuma chino hinwalinga, Zambi hanushinga. Atu jenu matangwa eswe maabwa ndungo, akwa kuchaya kunyi ni kutaha meya a mu zuwo lia Zambi yami.”

²⁴ Yaakumbulula ngwo: “Yetu ngamba jenu twachilingile, mumu twevwile kulu ngwo, Mwene Zambi, Zambi yenu, hanambila kavumbi kenyi Mose anwehe chifuchi chino cheswe ni kushiha eswe waze atwama mo. Twachilingile mumu te tunanuvwila mwongo; ngwetu, nyi ka, munutushiha.

²⁵ Haliabwila tuli mu chiyulo chenu, lingenu kuli yetu ngwe chize nunamono ngwenu, chinawaha.”

²⁶ Yoshua yaafunga, katayijile ko Aisraele kwashiha.

²⁷ Alioze chize ku matangwa waze aapwishile ndungo a kuchaya kunyi ni kutaha meya ja Aisraele ni a ku chilumbilo cha Mwene Zambi. Ndoo ni musono uno kaakulinga milimo yize homa haze atongwele Mwene Zambi mu kuwayila.