Yoshua 8 - Mukanda Wa Zambi 1970

Aisraele yaakumba Ayi

¹ Mwene Zambi yambila Yoshua ngwenyi: “Anda tujita eswe, ukanduke no ku limbo lia Ayi. Kanda ulekumuka chibwe kwivwa woma. Mungunukwasa kukumba mwanangana wa Ayi, ni limbo lienyi, mba chifuchi muchibwa nichenu.

² Chanutamba kulinga ku limbo lia Ayi, ni mwe mwanangana walio, ngwe chize nwalingile ku limbo lia Yeriku ni mwanangana walio. Alioze yuma ni yimuna yize munukabuba mo muyikabwa ni yenu. Longa akwa kujikinyina kunyima lia limbo.”

³ Chenacho Yoshua alingile nikuya ni tujita twenyi eswe ku Ayi. Yatongola tujita 30,000 a tachi kuhiana, yaatuma ha ufuku

⁴ ni Shimbi yino ngwenyi: “Yeenu nujikinyine kunyima lia limbo. Kanda nubwa kusuku, nutalatala.

⁵ Yami ni tujita twami, mutukundama ku limbo. Muze tujita twa Ayi maakundama mu kulimika ni yetu, mututewuluka ni kuchina, ngwe chize twalingile hatangu.

⁶ Maatuhanga ndoo muze hitwaakoka kusuku ni limbo. Maanyonga ngwo, kaanatuchina ngwe chize alingile hatangu.

⁷ Mba yenu munutuhuka ni kutambula lie limbo. Mwene Zambi, Zambi yenu, manukunjika lio.

⁸ Muze hinwatambula lie limbo, nuliocha kahia, ngwe chize Mwene Zambi hamba. Yino ye Shimbi ngunanwehe.”

⁹ Mba Yoshua yaatuma. No yaaya kuma kuze kwakujingilika ni kushimbwila ko, ku chitokelo cha Ayi, hakachi ka Ayi ni Betele. Yoshua yanongama ha musumba.

¹⁰ Yoshua yalimeneka ni kukungulula tujita. Mba iye ni miata ja Aisraele yaatwala ku Ayi.

¹¹ Yaaya ku chikolo cha limbo, yaasa ko musumba ku norde. Hakachi ka ayo ni Ayi yihabwa mbongo.

¹² Yaanda tununu atano a malunga, yaasweka ku chitokelo cha limbo, hakachi ka Ayi ni Betele.

¹³ Tujita yaalilonga mu kwasa jita. Mbunga yinene yaabwa ha musumba ku norde ya limbo, akwo yaabwa ku chitokelo. Yoshua yanongama mu chikulo.

¹⁴ Muze mwanangana wa Ayi hamona tujita twa Yoshua, yalipupwisa. Iye ni atu jenyi eswe yaaya ku chikulo cha Yordau ni kulitakana ni Aisraele homa haze abwile hatangu. Kaanyingikine ko ngwo, limbo haalijingilika.

¹⁵ Yoshua ni tujita twenyi yaalionga ngwe keeshi tachi, yaachinyina ku puya.

^16-17 Malunga eswe a mu limbo yaalikungulula aahange. Malunga eswe a mu Ayi yaakaula Aisraele, yaahichika limbo liawashi. Kumwasalile ko lunga niumwe ha kulifunga.

¹⁸ Henaho Mwene Zambi yambila Yoshua ngwenyi: “Olola kunga lie ku limbo lia Ayi. Tala, hinakukunjika lio.” Yoshua yalinga ngwe chize amwambile.

¹⁹ Ha shimbu lize olwele kwoko lienyi, malunga waze te anajikinyina limbo yaakatuka nikawashi, yaazomboka, yaalikumba. Mba yaalipupwisa ni kuliocha kahia.

^20-21 Muze malunga ja Ayi atalile kunyima, yaamona mwishi unafwindangana mu limbo ndoo kwilu. Yoshua ni tujita twenyi no yaaumona, yaanyingika ngwo, haatambula limbo. Yaalumuka, yaabutuka kushiha malunga ja Ayi. No kaamwene ko jila ya kuchinyina.

²² Tujita waze ochele limbo lia Ayi yaapalumuka, yaasa jita ni akwa Ayi. No yaanyingika ngwo, Aisraele haatujikinyina. Aisraele yaashiha akwa Ayi eswe. Niumwe kachinyine ko, kukwasalile niumwe ni mwono,

²³ shina lume mwanangana wa Ayi. Yaamukwata, yaamutwala kuli Yoshua.

²⁴ Aisraele yaashiha akwa kole jo eswe mu puya kuze aahangilile, mba yaahiluka ku Ayi, yaashiha atu eswe mu limbo.

^25-26 Yoshua kachijile ko kwoko lienyi lize te anolola nalio kunga lienyi ndoo ni muze ashihile akwa Ayi eswe. Kwoka cho 12,000 malunga ni mapwo.

²⁷ Aisraele yaabuba ngombe ni yikumba yibema ya mu limbo, ngwe chize Mwene Zambi alwezele Yoshua.

²⁸ Chenacho Yoshua ochele limbo lia Ayi, yalihichika hahululu. Che lili ndoo ni musono.

²⁹ Yasukika mwanangana wa Ayi, mujimba wenyi yiubwa ko ndoo chingoloshi. Yoshua yahana Shimbi aumbile. No yaaumbila ku chikolo cha chipanga cha limbo. Yaaulumbika chingina cha mawe. Kwe chili ndoo ni musono.

Yoshua yatanga Shimbi ha mulundu wa Ebale

³⁰ Yoshua yatungila Mwene Zambi, Zambi ya Aisraele, chilumbilo ha mulundu wa Ebale.

³¹ Yachitunga nikulita ni chize Mose, kavumbi ka Mwene Zambi, ambilile Aisraele, ngwe chize chinasonewa mu Shimbi ja Mose ngwo: “chilumbilo cha mawe waze kabulile ko ni mweto.” Henaho alambwilile milambu ya kwocha ku meso ja Mwene Zambi, ni ya kulivwa nenyi.

³² Kwenako, ku meso ja Aisraele, Yoshua yasoneka nawa ha mawe Shimbi jize asonekene Mose.

³³ Aisraele eswe hamwe ni miata jo, ni akwa lutwe jo, ni ngaji jo, ni njize waze atwama mukachi ko, eswe yaamana sali ni sali lia mushete wa Usendo wa Zambi ni atu, ku meso ja mahako Alevi, waze te akuumbata. Mbunga yimwe ya atu yaamana yoomba nyima ku mulundu wa Gerizime. Mbunga yikwo yaamana yoomba nyima ku mulundu wa Ebale. Mose kavumbi ka Mwene Zambi yaalweza kulinga Chenacho muze tangwa mulikaheta hanga Mwene Zambi aawahise.

³⁴ Mba Yoshua yatanga Shimbi Jeswe, kuwahisa ni kushinga nawa, ngwe chize chinasonewa mu mukanda wa Shimbi.

³⁵ Yoshua yatanga Shimbi jeswe ja Mose ku meso ja atu. Mu mbunga yimubwa mapwo, ni ana, ni njize waze te atwama mukachi ko.