Yoshua 7 - Mukanda Wa Zambi 1970

Kuvulumuna cha Akane

¹ Aisraele kaafungile ko Shimbi jize Mwene Zambi aahele ngwenyi, kanda abuba yuma mu limbo lia Yeriku. Umwe mutu jina lienyi Akane, yakolema Shimbi yize. Mba Mwene Zambi yatenukina Aisraele. (Akane te mwana wa Karmi, mujikulu wa Zabdi, wa ku jimo lia Zera, wa ku vungu lia Yuda.)

² Yoshua, ku Yeriku yatuma amwe malunga ku Ayi, limbo lia ku chivumbuko cha Betele, hehi ni Betavene, ni kwendesa chifuchi. Muze haachilinga,

³ yaahiluka kuli Yoshua nikwamba ngwo: “Kuchalitele kuya ni atu eswe ni kuseleka Ayi. Tumenu lume tujita tununu aali hanji atatu. Kanda nutuma tujita eswe, hi limbo linene ko.”

⁴ Chenacho tujita tununu atatu ayile ku jita, alioze yaachina ku meso ja akwa Ayi.

⁵ Akwa Ayi yaahanga tujita twa Aisraele chize ku chikolo cha limbo ndoo homa haze te akubulila mawe, yaashiha makumi atatu ni asambano muze te anapalumuka ha mulundu. Aisraele yaalekumuka, yeevwa woma.

⁶ Mba Yoshua ni makulwana ja Aisraele yaasonya mahina jo, yaafulamana hashi kulutwe lia mushete wa Usendo wa Mwene Zambi, yaalimwangina fufuta ha mitwe ni kusolola chinyengo cho, yaahetamina hashi ndoo chingoloshi.

⁷ Yoshua yamba ngwenyi: “Lwangu mama! Mwene Zambi, kuchi watwechele yetu eswe tuzauke Yordau? Ni kuukunjika mu moko ja Aamore hanga atwonone, nyi? Mumu yika kuwatutayijile kutwama kwetu musali lia Yordau?

⁸ Mwene Zambi kuchi mungwamba kama muze Aisraele haachina ku meso ja akwa kole jo?

⁹ Akanana ni atu eswe a mu chifuchi maachivwa. Maatujingilika, maatushiha yetu eswe! Nyi chocho, kuchi muulinga mumu ha jina lie lilemu?”

¹⁰ Mwene Zambi yakumbulula Yoshua ngwenyi: “Kuchi unabombo chichize hashi? Katuka!

¹¹ Aisraele haavulumuna! Haashiha Usendo uze nakolesele no, uze nambile ngwami, nwoononokena. Haanda yimwe yuma ya chijila te chaatamba kwonona. Haayiya, haahanjika mahuza, haayichinga hamwe ni yuma yo.

¹² Kashika Aisraele kaahashile kujikiza ni kulimika ni akwa kole jo. Kaanachina mumu Zambi haakunjika mu kwonona! Chichi kubwa hamwe ni yenu shina munuchiza yuma yize nanuhele Shimbi ngwami, kanda nuyanda!

¹³ Katuka! Ujilike atu, alilulike ni kwiza ku meso jami. Alweze alilulike ni kulitakana ni yami hamene, mumu yami Mwene Zambi, Zambi ya Aisraele, nguli ni maliji wano a kwalweza: ‘Aisraele, nuli ni yuma ya Shimbi mukachi kenu yize nanwambile mu kuyonwona! Kunwahashile kujikiza ni kulimika ni akwa kole jenu ndoo hinwachiza yuma yize!’

¹⁴ Alweze ngwe, hamene chichamene nukalilulika nukeze ku meso jami, vungu ni vungu. Vungu lize mungukatongola maakeza kulutwe jimo ni jimo. Jimo lize mungukatongola maakeza kulutwe jiko ni jiko. Jiko lize mungukatongola maakeza kulutwe mutu ni mutu.

¹⁵ Mweswawo mungukatongola, nyi haamuwana ni yuma yize nasele Shimbi, maakamwocha hamwe ni akwa jiko lienyi ni yuma yenyi yeswe, mumu haneha lamba ni sonyi hali Aisraele, hashiha Usendo wami.”

¹⁶ Yoshua yalimeneka, yatwala Aisraele ku meso ja Mwene Zambi, vungu ni vungu. Yatongola vungu lia Yuda.

¹⁷ Yasa vungu lia Yuda kulutwe, jimo ni jimo. Yaatongola jimo lia Zera. Yasa jimo lia Zera kulutwe, jiko ni jiko. Yatongola jiko lia Zabdi.

¹⁸ Yasa jiko lia Zabdi kulutwe, mutu ni mutu. Yatongola Akane, mwana wa Karmi, mujikulu wa Zabdi.

¹⁹ Yoshua yamwamba ngwenyi: “Mwanami, hanjika umwenemwene ku meso ja Mwene Zambi, Zambi ya Aisraele, ushikise. Ungulweze chize unakalinga. Kanda unguswekela cho.”

²⁰ Akane yakumbulula ngwenyi: “Chamwenemwene, ngunakavulumuna Mwene Zambi, Zambi ya Aisraele. Ngunakalinga chino.

²¹ Mu yuma yize twabubile ku jita yingumona mo chikuto chibema cha ku Babilonia, ni kilo jaali ja prata, ni kilo yimuwika ya Chipinji cha oru. Nayivwilile chipululu, mba yinguyanda. Kuyili mu wina mu zuwo liami, prata yili kushi.”

²² Mba Yoshua yatuma amwe atu, ni kwanda ye yuma. No yaazomboka, yaayiwana yakushikila mu zuwo lienyi prata kushi.

²³ Yaayanda yaayitwala kuli Yoshua ni kuli Aisraele eswe, yaayinangika ku meso ja Mwene Zambi.

²⁴ Yoshua ni Aisraele eswe yaakwata Akane, ni prata, ni chikuto, ni oru, hamwe ni anenyi a malunga ni a mapwo, ni ngombe, ni yimbulu ni mapanga jenyi ni zuwo lienyi lia makubu, ni yuma yenyi yikwo yeswe. Yaatwala atu ni ye yuma ku chikulo cha Lamba.

²⁵ Yoshua yamuhula ngwenyi: “Kuchi mba unakatukokela lamba libwa haha? Haliabwila Mwene Zambi makumwesa lamba!” Atu eswe yaamushiha ni mawe. Yaashiha nawa akwa jiko lienyi ni mawe, ni kwocha yuma yenyi yeswe.

²⁶ Yaamulumbika mulumba wa mawe, kwe uli ndoo ni musono. Kashika homa haze akuluka ho jina ngwo, chikulo cha Lamba. Mba Mwene Zambi hikevwile ko nawa ufwatulo.