Yoshua 6 - Mukanda Wa Zambi 1970

Aisraele yaakumba Yeriku

¹ Yikolo ya Yeriku te yakwajila mumu hali Aisraele. Tujita yaayifunga Kanawa; mutu niumwe wanjilile hanji watuhukile mu limbo.

² Mwene Zambi yambila Yoshua ngwenyi: “Tala, hinakunjika Yeriku mu moko jenu, hamwe ni mwe mwanangana walio ni e tujita twalio eswe a tachi.

³ Yena ni tujita twe jingenu limbo chisuho chimuwika tangwa ha tangwa ndoo matangwa asambano.

⁴ Mahako shimbiali atetekele kulutwe lia mushete wa Usendo ni kumbata yitavwi ya mbinga ja mapanga. Ha tangwa lia muchishimbiali yena ni e tujita twe chanutamba kujinga limbo yisuho shimbiali shimbu mahako anembi yitavwi.

⁵ Mba akahumune yitavwi ha pinji yisuku. Muze munukevwa maliji a yitavwi, atu eswe akakololoka. Hohene chipanga cha limbo muchibuzuka. Mba tujita eswe akanjile mu limbo.”

⁶ Yoshua yatambika mahako, yaalweza ngwenyi: “Andenu mushete wa Usendo. Shimbiali a kuli yenu, tetekelenu kulutwe liawo, ni kumbata yitavwi ya mbinga ja mapanga.”

⁷ Hohene yalweza atu jenyi ajinge limbo. Mbunga ya tujita yaatetekela kulutwe lia mushete wa Usendo wa Mwene Zambi.

^8-9 Yaalinga ngwe chize Yoshua alulikile. Mbunga ya tujita yaatetekela kulutwe lia mahako waze te anembi yitavwi. Kunyima lio yikukaula mahako waze te anambata mushete wa Usendo wa Zambi ni atu, mba mbunga yikwo ya tujita yaakaula. Mahako yeembamba yitavwi shimbu heswe.

¹⁰ Yoshua te halweza atu ngwenyi: “Kanda nukololoka, chibwe kuhanjika ndoo ni muze mungwamba ngwami, kololokenu.”

¹¹ Chenacho alwezele mbunga ya malunga waze te anambata mushete wa Usendo wa Mwene Zambi kujinga limbo chisuho chimuwika. Mba yaahiluka ku musumba ni kubomba.

^12-13 Yoshua yalimeneka nawa. Mba ha chisuho cha muchaali mahako ni tujita yaajinga limbo ngwe chize alingile tangwa litangu: hatangu tujita, mwabwamuze mahako shimbiali waze te anembi yitavwi shimbiali, mba mahako waze ambata mushete wa Usendo wa Mwene Zambi, yikusula mbunga yikwo ya tujita. Mahako yeembamba yitavwi shimbu lieswe.

¹⁴ Ha tangwa lize lia muchaali yaajinga limbo chisuho chimuwika ngwe hatangu, mba yaahiluka ku musumba. Chino yaachilinga matangwa asambano.

¹⁵ Ha tangwa lia muchishimbiali yaalimeneka muze te hikwabatwoka ngwangwangwa. Yaajinga limbo chizechene nawa; yaachilinga yisuho shimbiali. Shina tangwa lize limuwika ajingile limbo yisuho shimbiali.

¹⁶ Ha kujinga chisuho cha muchishimbiali, muze te mahako! anembi yitavwi ni kuyihumuna pinji yisuku, Yoshua yalweza atu jenyi akololoke. Yaamba ngwenyi: “Mwene Zambi hanwaha limbo lino!

¹⁷ Limbo ni yuma yeswe yilimo chatamba kuyifwenya upu, ngwe mulambu ku meso ja Mwene Zambi. Shina lume chitanji Rahabe ni usoko wenyi, enoo munuhichika ni mwono, mumu waswekele ngendeshi jetu.

¹⁸ Alioze kanda nwanda Chuma nichimwe chize chatamba kufwenya Nyi ngwe nwachilinga, munukoka lamba ha musumba wa Aisraele awonone.

¹⁹ Yuma yeswe yakulinga ni prata, ni oru, ni unengu, ni utale, yili ya chijila, ya mbala ya Mwene Zambi. Chatamba kuyisa mu mushete wa Mwene Zambi.”

²⁰ Chenacho mahako embile yitavwi. Ha shimbu lize malunga achivwile, yaakololoka; chipanga yichibuzuka. Mba tujita eswe yalipupwisa ni kunjila mu limbo ni kulikumba.

²¹ Yaashiha atu eswe mu limbo ni mikwale, malunga ni mapwo, makulwana ni twanuke. Yaashiha nawa ngombe, ni mapanga, ni yimbulu.

²² Yoshua yambila atu waze aali abwile ngendeshi ja chifuchi ngwenyi: “Njilenu mu zuwo lia mwe chitanji numwande, ni e akwa zuwo lienyi eswe, ngwe chize nwamulakenyene.”

²³ Chenacho ayile ni kutuhwisa Rahabe, ni tato ni naye, ni mandumbu jenyi, ni eswe a ku jiko lienyi. Yaaya no eswe, ni akwa jiko ni e ndungo, ni kwafunga mu musumba wa Aisraele.

²⁴ Mba yoocha limbo ni yuma yamo yeswe, shina lume yuma yakulinga ni oru, ni prata, ni unengu, ni utale. Yenayo ambachile nikuyisa mu mushete wa Mwene Zambi.

²⁵ Alioze Yoshua yalamwina chitanji Rahabe ni usoko wenyi eswe, mumu waswekele ngendeshi waze atumine ni kwendesa Yeriku. (Vungu lienyi liatwama mu Israele ndoo ni musono.)

²⁶ Ha tangwa lize Yoshua yalishinga ngwenyi: “Mweswawo meseka kutungulula limbo lia Yeriku, Mwene Zambi makamushinga. Mweswawo makasa fundamentu makafwisa mwanenyi mutangu. Mweswawo makatungulula yajilo makafwisa kasulasongo.”

²⁷ Chenacho Mwene Zambi abwile hamwe ni Yoshua, lufuma wenyi yaamana ndusu mu chifuchi cheswe.