Yoshua 5 - Mukanda Wa Zambi 1970

¹ Mianangana ja Aamore eswe waze te atwama ku chitokelo cha Yordau ni mianangana ja Akanana eswe waze te atunga ku kalunga lwiji Mediterane yeevwa chize Mwene Zambi omishine Yordau ndoo muze Aisraele eswe azaukile. Yaabutuka kwivwila Aisraele woma, yaalekumuka.

Chavula ku Gilgale

² Mwene Zambi yambila Yoshua ngwenyi: “Linga poko ya mawe hanga upwise Aisraele ngalami.”

³ Yoshua yalinga chize Mwene Zambi amwambile, yapwisa Aisraele ngalami homa haze akuvuluka ngwo, mulundu wa Chavula.

^4-6 Muze Aisraele haatuhuka mu chifuchi cha Egiptu, malunga eswe yaapwisa ngalami. Alioze ha miaka yize makumi awana endanganyine mu puya, ana jo kaapwishile ko ngalami. Nawa, ku songo lia miaka yize, malunga waze abwile tujita muze akatukile ku Egiptu, yaafwafwa kwo mumu koononokene ko ku maliji a Mwene Zambi. Kaamwene ko chifuchi cha chinuno chize alakenyene kuli tushakulu two, ngwe chize Mwene Zambi alishingile.

⁷ Ana a malunga ja waze afwilile mu puya te kanda achaatwala ku chavula, enoo Yoshua apwishile ngalami.

⁸ Muze malunga eswe haapwisa ngalami, yaashimbula ha musumba ndoo ni muze haahinduka.

⁹ Mwene Zambi yalweza Yoshua ngwenyi: “Musono mba hinanuchiza sau lize nwabwile nalio mu undungo mu Egiptu.” Kashika jina hako ndoo ni musono ngwo, Gilgale.

¹⁰ Muze te Aisraele achili ha musumba mu chana cha Yeriku, yaalinga chiwanyino cha Kubalika chingoloshi ha tangwa kumi ni lia muchiwana lia kakweji.

¹¹ Tangwa lize liasulile ko liabwile tangwa litangu lize Aisraele abutukile kulia yuma ya mu chifuchi cha Kanana: mbolo yize kuyishi yitumbo, ni tiriku ya kwocha.

¹² Chize ku tangwa lize mana hikaaholokele ko nawa, Aisraele hikaalile ko nawa mana. Chize ku tangwa lize yaabutuka kulia yakulia ya mu Kanana.

Yoshua ni lunga yoze te uli ni mukwale

¹³ Muze Yoshua abwile hehi ni limbo lia Yeriku, susumuku yamona lunga unamana kulutwe lienyi, te kanakwata mukwale. Yoshua yamukundama, yamuhula ngwenyi: “Yena uli wa kuli tujita twetu, nyi uli mukwa kole?”

¹⁴ Mwe mutu yakumbulula ngwenyi: “Ka, nguli mwata wa tujita twa Mwene Zambi.” Yoshua yafulamana nikwamba ngwenyi: “Mwene nguli kavumbi ke. Kuchi unazange ngulinge?”

¹⁵ Mwe mwata wa tujita twa Mwene Zambi yamukumbulula ngwenyi: “Zula sapato je; homa unamana hali homa ha chijila.” Yoshua yalinga ngwe chize amwambile.