Yoshua 4 - Mukanda Wa Zambi 1970

Chingina cha mawe akwiwulukila

¹ Muze atu eswe haazauka Yordau, Mwene Zambi yambila Yoshua ngwenyi:

² “Tongola malunga kumi ni aali, mutu umuwika ku vungu ni vungu.

³ Alweze ande mawe kumi ni aali hakachi ka Yordau, homa haze te hanamana e mahako. Alweze ambate e mawe akaase ha musumba haze munubomba musono.”

⁴ Chenacho Yoshua atambikile malunga waze kumi ni aali,

⁵ yaamba ngwenyi: “Yeenu mukachi ka Yordau haze hali mushete wa Usendo wa Mwene Zambi, Zambi yenu. Mutu mweswe ambate liwe ha chipaya chenyi, liwe limuwika ku vungu ni vungu lia Israele.

⁶ Mawe wano maakewulula atu chize Mwene Zambi hanalingi. Kulutwe, muze ana jenu maakanuhula ngwo, kuchi mawe wano analumbunuka,

⁷ nukaalweza chize meya a Yordau ahandunukine muze mushete wa Usendo wa Zambi ni atu wazaukile Yordau. Mawe waze maakewulula Aisraele chize Zambi aazawishile.”

⁸ E malunga yaalinga ngwe chize aalwezele kuli Yoshua. Yaanda mawe kumi ni aali mukachi ka Yordau, liwe limuwika ku vungu ni vungu, yaatwala ha musumba, yaasa hashi, ngwe chize Mwene Zambi alwezele Yoshua.

⁹ Yoshua yatunga nawa chingina cha mawe kumi ni aali hakachi ka Yordau, haze te anamana mahako waze anambata mushete wa Usendo. (Mawe waze kwe ali ndoo ni musono uno.)

¹⁰ E mahako yaamana mukachi ka Yordau ndoo ni muze atu amanunwine kulinga yeswe yize Mwene Zambi ambilile Yoshua, Chenacho Yoshua alingile yeswe yize amulwezele Mose. Aisraele yaalipupwisa kuzauka.

¹¹ Muze atu eswe haazauka, mahako waze te anambata mushete wa Usendo yaatetekela kulutwe.

¹² Malunga a ku mavungu ja Rubene, ni Gade, ni Chipinji cha Manase waze te haalipakata yitwa ya jita, eno aliangile kuzauka kulutwe lia atu akwo ngwe chize Mose alwezele.

¹³ Tujita ngwe 40,000 azaukile ku meso ja Mwene Zambi, yaaheta mu chana hehi ni limbo lia Yeriku.

¹⁴ Aisraele yaalemesa Yoshua ha chize alingile Mwene Zambi ha tangwa lize. Yaamulemesa matangwa eswe a mwono wenyi ngwe chize alemesene Mose.

¹⁵ Mba Mwene Zambi yambila Yoshua ngwenyi:

¹⁶ “Ambila mahako waze anambata mushete wa Usendo atutuke mu Yordau.”

¹⁷ Yoshua yaambila.

¹⁸ Muze mahako haatutuka, meya a Yordau yaahiluka nawa muma lio, yaaheta ndoo ni ku tunda ngwe hatangu.

¹⁹ Aisraele yazauka Yordau ha tangwa lia muchikumi lia kakweji mutangu, yaajika musumba ku Gilgale, ku sali lia chivumbuko lia Yeriku.

²⁰ Kwenako Yoshua asele chingina cha mawe kumi ni aali waze anjile mu Yordau.

²¹ Yalweza Aisraele ngwenyi: “Kulutwe, muze ana jenu maakahula ulumbunwiso wa mawe wano,

²² nukaalweza chize Aisraele azaukile Yordau hashi homu.

²³ Nukaalweza ngwenu, Mwene Zambi, Zambi yenu, wanumishinyine meya a Yordau ndoo ni muze nwazaukile, ngwe chize anumishinyine nawa kalunga lwiji Muchila.

²⁴ Ha chino akwa hashi heswe maakanyingika ndundo ja Mwene Zambi, ni yenu munukalemesa Mwene Zambi, Zambi yenu, ku miaka yeswe.”