Yoshua 3 - Mukanda Wa Zambi 1970

Aisraele yaazauka Yordau

¹ Muze hikwacha Yoshua ni Aisraele eswe yaakatuka ku musumba wa Akasia, yaaya ku lwiji Yordau, yaasa ko musumba akashimbwile tangwa lia kuzauka.

² Muze matangwa atatu haabalika, miata yendangana ha musumba,

³ yaambila atu ngwo: “Muze munumona mahako kaanambata mushete wa Usendo wa Mwene Zambi, Zambi yenu, nukatuka ha musumba, nwakaule.

⁴ Ayo maanulweza jila, mumu yenu kanda nuchibalika kama mu jila yino nilimwe tangwa. Alioze kanda nukundama ku mushete wa Usendo, nuhichika ko Chipinji cha kilometro yimuwika hakachi.”

⁵ Yoshua yalweza atu ngwenyi. “Lijilikenu, mumu hamene Mwene Zambi makalinga yilayi mukachi kenu.”

⁶ Mba yambila mahako ambate mushete wa Usendo ni kutetekela nawo kulutwe lia atu. No yaalinga ngwe chize aalwezele.

⁷ Mwene Zambi yalweza Yoshua ngwenyi: “Chize musono mungukulemesa ku meso ja Aisraele eswe. Mba maanyingika ngwo, nguli hamwe ni yena ngwe chize nabwile hamwe ni Mose.

⁸ Lweza mahako ambate mushete wa Usendo ndoo ku lwiji, aliate mu meya ni kushimbula.”

⁹ Mba Yoshua yalweza atu ngwenyi: “Kundamenu kuno nwivwe chize Mwene Zambi, Zambi yenu, anambe.

¹⁰ Muze munuya kulutwe, Zambi manuhangila Akanana, ni Ahite, ni Ahive, ni Aperize, ni Agirgashe, ni Aamore, ni Ajebuse. Mununyingika ngwenu, Zambi ya mwono kali mukachi kenu,

¹¹ muze we mushete wa Usendo wa Mwene wa hashi heswe hiwazauka Yordau kulutwe lienu.

¹² Haliabwila tongolenu malunga kumi ni aali, mutu umuwika ku vungu ni vungu lia Aisraele.

¹³ Muze e mahako waze anambata mushete wa Usendo wa Mwene Zambi wa hashi heswe maaliata mu meya, e meya a kuto keechi kubalika nawa, maamana ngwe chingina.”

^14-15 Kabwile kakweji wa kuhela mihuko, ni mwe lwiji te hazala meya. Muze te atu anakatuka ha musumba ni kuzauka Yordau, mahako yaatetekela kulutwe lio, kaanambata mushete wa Usendo wa Zambi ni atu. Muze mahako haaliata mu meya,

¹⁶ e meya yaalihandununa, yaamana ngwe chingina kusuku ku limbo lia Samutu, lize lili hehi ni limbo lia Zaretane Meya a ku sango lia chitende cha Kufwa yaabatuka lume ngwii, ni atu yaazauka Yordau hashi homu hehi ni Yeriku.

¹⁷ Muze atu anazauka, mahako waze te anambata mushete wa Usendo wa Mwene Zambi yaamana hakachi ka Yordau ndoo ni muze atu eswe haazauka.