Yoshua 24 - Mukanda Wa Zambi 1970

Yoshua yakolesa nawa Usendo wa Zambi ni Aisraele

¹ Yoshua yakungulula mavungu eswe ja Aisraele ku limbo lia Shekeme. Yatambika makulwana, ni miata, ni ngaji, ni akwa kuyula ja Aisraele. No yeeza ku meso ja Zambi,

² Yoshua yaamba ngwenyi: “Mwene Zambi, Zambi ya Aisraele, kanambe chino ngwenyi: ‘Mwakawali tushakulu twenu te kaatwama musali lia lwiji Ufrateze ni kuwayila mazambi eka. Umuwika hakachi ko jina lienyi Tera, tato ya Abrahama ni Nahore.

³ Yinguchiza kashakulu kenu Abrahama musali lia Ufrateze ni kumusongwela mu chifuchi cheswe cha Kanana. Yingumupwisa vungu linene. Yingumwaha Isake,

⁴ ni kuli Isake yingumwaha Yakoba ni Esau. Esau yingumwaha chifuchi cha milundu cha Edome kubwa chihinga chenyi. Alioze kashakulu kenu Yakoba ni ana jenyi yaapalumuka mu chifuchi cha Egiptu.

^5-6 Munabwamuze yingutuma Mose ni Arone, yingumwesa akwa Egiptu lamba linji. Alioze yingutuhwisa tushakulu twenu mu Egiptu ni kwaneha ndoo ku kalunga lwiji Muchila, muze akwa Egiptu akawile ni matemba a jita ni tuvwalu,

⁷ tushakulu twenu yaakololoka kuli yami ngwakwase. Yingusa milima hakachi ko ni akwa Egiptu, yingupukwila meya hali akwa Egiptu, eswe yaafwa. Nunanyingika chize nalingile ku chifuchi cha Egiptu. “ ‘Nwabwile mu puya miaka yinji.

⁸ Mba yingunuhetesa mu chifuchi cha Aamore, waze te atwama ku chivumbuko cha Yordau. Yaasa nenu jita, alioze yingunukwasa ni kwakumba. Yinutambula chifuchi cho, yingwoonona ku meso jenu.

⁹ Mba mwanangana wa Moabe, Balake, mwana wa Zipore, yasa nenu jita. Yatuma liji kuli Balame, mwana wa Beore, hanga anushinge.

¹⁰ Alioze yami chatayijile ko liji lia Balame. Kashika yanuwahisa. Chenacho nanupulwile ku moko ja Balake.

¹¹ Yinuzauka Yordau, yinwiza ku limbo lia Yeriku. Akwa Yeriku yaasa nenu jita, ngwe chize alingile Aamore, ni Aperize, ni Akanana, ni Ahite, ni Agirgashe, ni Ahive, ni Ajebuse. Alioze yingunukwasa ni kwakumba eswe.

¹² Yingweevwisa mwongo ngwe chize akulinga mboji, yinguhuma mianangana aali a Aamore ku meso jenu. Mikwale yenu ni mata jenu akwasa kaalingile ko nichimwe.

¹³ Yingunwaha minda yize kunwalimine ko ni membo waze kunwatungile ko. Mwenamo nwatwama haliabwila, nwakulia mihuko ya vinyu ni ya olive yize kunwatumbile ko.’ ”

¹⁴ Yoshua yaweza ho maliji ngwenyi: “Kashika, haliabwila lemesenu Mwene Zambi, numulingile ni mbunge yimuwika ya kushishika. Mbilenu mahamba waze te tushakulu twenu akukombelela mu yifuchi ya Mesopotamia ni Egiptu; lingilenu Mwene Zambi wika.

¹⁵ Nyi kunwazangile kumulingila, hitongolenu musono yoze munulingila, mazambi waze tushakulu twenu te akukombelela mu Mesopotamia hanji mazambi ja Aamore, a mu chifuchi chize nwatwama haliabwila. Alioze yami ni akwa jiko liami mutulingila Mwene Zambi.”

¹⁶ Atu yaamukumbulula ngwo: “Kutwahashile kwehuka Mwene Zambi nihakepe ni kulingila mazambi eka!

¹⁷ Mumu Mwene Zambi, Zambi yetu, hanatutuhwisa yetu ni atata jetu mu undungo mu chifuchi cha Egiptu, hitunamono yikomokeso yize alingile. Hanatufungu kanawa chibwe twendele mukachi ka mavungu anji muze twabaliekele.

¹⁸ Mwene Zambi yatuhumina Aamore eswe waze te atwama mu chifuchi chino. Kashika ni yetu nawa mutulingila Mwe ne Zambi; kali Zambi yetu.”

^19-20 Yoshua yambila Aisraele ngwenyi: “Alioze Mwene Zambi kali munangi, kali Zambi ya ukwa. Tangwa likwo kunuchi kuhasa kumulingila, mumu nyi munukamwehuka ni kulingila mazambi eka kechi kanukonekena milonga yenu. Alioze makalimika ni yenu ni kunumwesa lamba. Makanunongesa, chibwe hatangu hananulingila yibema.”

²¹ Atu yaakumbulula Yoshua ngwo: “Ka! Mutulingila Mwene Zambi.”

²² Yoshua ngwenyi: “Yenwene nuli yela ngwenu, hitwatongola kulingila Mwene Zambi.” Ayo ngwo: “Ewa, tuli yela.”

²³ Yoshua ngwenyi: “Nyi Chenacho, mbilenu mazambi a yilambala waze ali mukachi kenu, hanga nuwayile Mwene Zambi, Zambi ya Aisraele.”

²⁴ Mba atu yaakumbulula Yoshua ngwo: “Mutulingila Mwene Zambi, Zambi yetu. Mutufunga Shimbi jenyi.”

²⁵ Chenacho ha tangwa lize ku Shekeme Yoshua yakolesa Usendo ni atu, yaaha Shimbi ni yiyulo ha kuyononokena.

²⁶ Yoshua yasoneka Shimbi jino mu mukanda wa Shimbi ja Zambi. Mba yanda luliwe, yalumika mushi lia mutondo shene, muma mwa chijila cha Mwene Zambi.

²⁷ Yambila atu ngwenyi: “Talenu luliwe luno mulubwa chela hakachi ketu. Hilwevwa maliji eswe waze Mwene Zambi hatwamba. Kashika mulubwa chela cha kulimika ni yenu, nyi ka, munulimika ni Zambi yenu.”

²⁸ Mba Yoshua yalishika ni atu. No yaahiluka eswe ku yifuchi yo.

Kufwa cha Yoshua ni Eleazare

²⁹ Muze halinga yino yeswe, Yoshua mwana wa Nune, kavumbi ka Mwene Zambi, te habwa ni miaka 110, mba yafwa.

³⁰ No yaamufunda mu chifuchi cha chihinga chenyi ku Timnate Sera, mu chifuchi cha milundu ya Efraime, ku sali lia ku norde lia mulundu wa Gashe.

³¹ Ha matangwa eswe a mwono wa Yoshua, Aisraele te kaakulingila Mwene Zambi, yaanyongonona nawa kumulingila ndoo ni ku kufwa cha miata waze amwene yuma yeswe yize Mwene Zambi alingilile Aisraele.

³² Mujimba wa Josefe, uze Aisraele akatukile nawo mu Egiptu, yaaufunda ku Shekeme, ku chifuchi cha chihinga chize Yakoba alanjile kuli ana ja Aamore, tato ya Shekeme, ni kulakaji lia mbongo ja prata. Chifuchi chize yichibwa chihinga cha vungu lia Josefe.

³³ Eleazare mwana wa Arone yafwa, yaamufunda ku Gibea, limbo lia ku chifuchi cha milundu ya Efraime, lize ahanyine kuli mwanenyi Finehase.