Yoshua 23 - Mukanda Wa Zambi 1970

Longeso liakusula lia Yoshua

¹ Mwene Zambi yahwimisa Aisraele miaka yinji hakutwala kuli akwa kole jo. Yoshua te habwa kashinakaji,

² mba yatambika Aisraele eswe, makulwana, ni miata, ni ngaji, ni akwa kuyula, yaamba ngwenyi: “Hinabwa kashinakaji.

³ Hinwamona yuma yeswe yize Mwene Zambi, Zambi yenu, halinga ku mavungu wano eswe mumu hali yenu. Mwene Zambi, Zambi yenu, hanwashila jita.

⁴ Talenu, hinanusela mavungu waze hinakumba kulu, ni chifuchi ni mavungu waze asala akabwe chihinga cha mavungu jenu, chize ku lwiji Yordau ku chivumbuko ndoo ku kalunga lwiji Mediterane ku chitokelo.

⁵ Mwene Zambi, Zambi yenu, makaahuma, makaahanga ku meso jenu. Munukahinga chifuchi cho ngwe chize Mwene Zambi hananulakenya.

⁶ Kashika jikizenu, nwononoke, nufunge yuma yeswe yize yinasonewa mu mukanda wa Shimbi ja Mose. Nyi nwalemesa Shimbi jeswe,

⁷ kunuchi kulichinga ni mavungu waze ali hakachi kenu ni kuvuluka majina ja mazambi jo, chibwe kuuchinga no, kwafukamina ni kwakombelela.

⁸ Alioze lalaminyenu kuli Mwene Zambi, Zambi yenu, ngwe chize nwakulinga ndoo ni musono,

⁹ Mwene Zambi hahuma mavungu anene anene ni a tachi ku meso jenu, niumwe kahashile kuhamika ni yenu ndoo ni musono.

¹⁰ Mutu umuwika hakachi kenu kakuhuma malunga kulakaji, mumu Mwene Zambi, Zambi yenu, mwe wakunwashila jita, ngwe chize anulakenyene.

¹¹ Kashika, talenu kanawa, nuzange Mwene Zambi, Zambi yenu.

¹² Nyi munubwa yihulia ni kulikata ni mavungu waze haasala hakachi kenu, ni kulimbachila no,

¹³ nyingikenu ngwenu, Mwene Zambi, Zambi yenu, kechi kahuma nawa mavungu wano ku meso jenu. Kumaakabwa makambwila ni miheto kuli yenu, ni shikote (fimbo) ha manyima jenu, ni mbimbo mu meso jenu. Chino kuchichi kahwa ndoo ni muze mununonga, niumwe kechi kasala ho mu chifuchi chino chibema, chize Mwene Zambi, Zambi yenu, hananwehe.

¹⁴ “Haliabwila ngunayi mu jila yize akuya akwa hashi eswe. Yenu eswe nunanyingika mu mbunge jenu chize Mwene Zambi, Zambi yenu, hananwehe yuma yeswe yibema yize anulakenyene. Yilakenyo yeswe hanayimanununa; nichimwe kuchahonene.

¹⁵ Alioze ngwe chize hanamanununa yuma yeswe yibema yize anulakenyene, Chenacho nawa makanulinga yuma yeswe yibi, ndoo makanunongesa mu chifuchi chino chibema chize hananwehe.

¹⁶ Nyi kunwafungile Usendo wa Mwene Zambi, Zambi yenu, uze hanakolesa ni yenu, alioze nyi nwawayila ni kulingila mazambi eka, mba makanumwesa lamba mu ufwatulo wenyi. Munukanongena mu chifuchi chize chibema hananwehe, niumwe kechi kasala mo.”