Yoshua 22 - Mukanda Wa Zambi 1970

Mavungu a ku chivumbuko cha Yordau yaahiluka ku yifuchi yo

¹ Mba Yoshua yakungulula vungu lia Rubene ni Gade ni mbunga yimuwika ya vungu lia Manase.

² Yaamba ngwenyi: “Hinwalinga yeswe yize Mose, kavumbi ka Mwene Zambi, anushikile, hinwononoka ku maliji jami eswe.

³ Ha matangwa wano eswe kunwehukile usoko wenu Aisraele. Hinwononoka kanawa ku Shimbi ja Mwene Zambi, Zambi yenu.

⁴ Haliabwila, ngwe chize hanalakenya, Mwene Zambi, Zambi yenu, hahana uhwimino kuli usoko wenu Aisraele. Kashika hilukenu ku chifuchi chize nwechile, cha musali lia Yordau ku chivumbuko, chize anuhele Mose, kavumbi ka Mwene Zambi.

⁵ Fungenu kanawa Shimbi jize anuhele Mose ngwenyi: ‘Zangenu Mwene Zambi. Zambi yenu, lingenu chize anazange, fungenu Shimbi jenyi, bwenu akwa kushishika, mulingilenu ni mbunge jenu Jeswe, ni mwono wenu weswe.’ ”

^6-8 Mba Yoshua yaashika ni maliji wano ngwenyi: “Nunahiluka ku mahienu ni ubite Wahiana: ngombe, ni prata, ni oru, ni unengu, ni mahina. Yuma yize hinwabuba kuli akwa kole yenu nuyiteta ni usoko wenu Aisraele.” No yaakatuka ni kuya ku mahio. (Mose hanahana chifuchi cha ku chivumbuko cha lwiji Yordau ku mbunga yimuwika ya vungu lia Manase, alioze mbunga yikwo yaaha chifuchi cha ku chitokelo cha Yordau, hamwe ni mavungu akwo.)

⁹ Henaho mavungu ja Rubene, ni ja Gade, ni mbunga yimuwika ya Manase yaahiluka ku mahio. Yaahichika Aisraele akwo ku Shilo mu chifuchi cha Kanana, yaabutuka kuhiluka ku chifuchi cho Gileade, chize atambwile nikulita ni liji lia Mwene Zambi kuli Mose.

Chilumbilo ku Yordau

¹⁰ Muze mavungu ja Rubene, ni Gade, ni mbunga yimuwika ya Manase haaheta ku Gelilote, ku chitokelo cha lwiji Yordau, yaatunga ko chilumbilo chinene ku mbumbulu ya lwiji.

¹¹ Mavungu akwo ja Aisraele yeevwa ngwo: “Mavungu ja Rubene, ni Gade, ni mbunga yimuwika ya Manase haatunga chilumbilo ku Gelilote, muno musali lia Yordau!”

¹² Muze haachivwa, malunga eswe Aisraele yaalikungulula ku Shilo hanga aye ni kwasa jita ni mavungu a ku chivumbuko cha Yordau.

¹³ Mba Aisraele yaatuma Finehase, mwana wa hako Eleazare, kuli mavungu ja Rubene, ni Gade, ni mbunga yimuwika ya Manase, mu chifuchi cha Gileade.

¹⁴ Yaatumina miata kumi hamwe ni Finehase, umuwika wa ku vungu ni vungu lia ku chitokelo cha Yordau, mutu ni mutu mukwa lutwe wa ku jiko lienyi.

¹⁵ No yeeza ku chifuchi cha Gileade, ku mavungu ja Rubene, ni Gade, ni mbunga yimuwika ya Manase,

¹⁶ yaambila mu jina lia Chikungulwila cheswe cha Mwene Zambi, ngwo: “Mumu yika hinwalinga Chuma chino chibi ni kulimika ni Zambi ya Aisraele? Hinwalinga ni uhulia ni kulitungila chilumbilo chino! Kunushi kukaula nawa Mwene Zambi, nyi?

¹⁷ Kunushi kwiwuluka chize twavulumwine ku Peore, muze Mwene Zambi atumwesene lamba ni musongo ukalu, nyi? Twakumona lamba lize ndoo ni musono. Nunambe kuvulumuna nawa, nyi?

¹⁸ Kuma hinwalituna kukaula Mwene Zambi, nyi? Nyi hinwalimika ni Mwene Zambi musono, hamene makevwila ufwatulo Aisraele eswe.

¹⁹ Alioze nyi chifuchi chenu hichalichisa, tweyenu mu chifuchi cha Mwene Zambi, muze muli zuwo lienyi lia kuwayila, nukatambule chimwe chifuchi mukachi ketu. Alioze litwaminenu kulimika ni Mwene Zambi, ni kutupwisa nawa akwa kulimika nenyi muze nunatungu chilumbilo chino cha muchaali.

²⁰ Iwulukenu chize Akane, mwana wa Zera, akolemene Shimbi hakutwala ku yuma yize te chatamba kwenyeka. Chikungulwila cheswe yaamona lamba, Akane kafwile ko ukawenyi mumu ha mulonga wenyi.”

²¹ Hohene mavungu ja Rubene, ni Gade, ni mbunga yimuwika ya Manase yaakumbulula miata ja mavungu a ku chitokelo ngwo:

²² “Mukwa Ndundo kali Zambi! Kali Mwene Zambi! Mukwa Ndundo kali Zambi! Kali Mwene Zambi! Kananyingika chikuma chize tunakachitungila, ni yenu nawa chanutamba kunyingika! Nyi tunakachilinga tulilemese hanji tushihe Shimbi ya Mwene Zambi, tushihenu kwetu!

²³ Nyi ngwe twakolema Mwene Zambi ni kulinga chilumbilo cha yetwene tulambwile ho milambu ya mbuto, hanji ya kulivwa, chinalite Mwene Zambi atushihe kwetu.

²⁴ Alioze hi chocho ko! Twachitungile mumu twevwile woma ngwetu, ku miaka ya kulutwe hanji ana jenu maakahula ana jetu ngwo: ‘Kulikunda chika mukachi ka yenu ni Mwene Zambi, Zambi ya Aisraele?

²⁵ Zambi hanase njiza hakachi ketu ni yenu mavungu ja Rubene ni Gade. Kunushi kuliendela nichimwe ni Mwene Zambi.’ Tangwa likwo vungu lienu maahasa kukanjisa vungu lietu kuwayila Mwene Zambi.

²⁶ Kashika tunakatunga chilumbilo chino, hi cha kulambwila ko milambu ya kwocha hanji ya yawana,

²⁷ alioze muchibwa, chinyingi mumu hali ana jenu ni ana jetu, ni waze maakasemuka kulutwe akanyingike ngwo, chamwenemwene twakuwayila Mwene Zambi ku zuwo lia chijila ni yawana yetu ni milambu yetu ya kwocha ni ya kulivwa ni Zambi. Nyi ka, ana jenu maakatwamba ngwo: ‘Kunushi kuliendela nichimwe ni Mwene Zambi.’

²⁸ Tunakanyonga ngwetu, nyi muchikabwa Chenacho ana jetu maakahasa kwamba ngwo: ‘Talenu! Tushakulu twetu haanatungu chilumbilo chino nikulifwa ni chize cha Mwene Zambi. Kuchabwile ko chilumbilo cha kulambwila milambu ya kwocha hanji ya yawana, alioze te chinyingi mumu hali ana jenu ni ana jetu.’

²⁹ Chamwenemwene kutushi kweseka kulimika ni Mwene Zambi hanji kumwehuka ni kutunga chilumbilo cha kulambwila milambu ya kwocha, hanji ya mbuto, hanji ya yawana. Kutuchi kutunga chimwe chilumbilo chikwo. Tuli kulu ni chilumbilo cha Mwene Zambi, Zambi yetu, chize chili kulutwe lia zuwo lienyi.”

³⁰ Finehase ni akwa lutwe kumi a Chikungulwila waze abwile hamwe nenyi, miata ja majiko ja mavungu ja Aisraele a ku chitokelo, muze heevwa chize ambile mavungu ja Rubene, ni Gade, ni mbunga yimuwika ya Manase, yaahwima mbunge.

³¹ Finehase mwana wa hako Eleazare, yaamba ngwenyi: “Haliabwila hitwanyingika ngwetu, Mwene Zambi kali hamwe ni yetu, mumu kunwalimikine nenyi. Ha chino hinwatulamwina yetu Aisraele ku lamba lize te Mwene Zambi maatumwesa.”

³² Hohene Finehase mwana wa hako Eleazare ni miata yaahichika mavungu ja Rubene ni Gade mu chifuchi cha Gileade. Yaahiluka ku chifuchi cha Kanana kuli Aisraele, yaalumbunwina maliji eswe.

³³ Aisraele yaachimona ngwo, chinalite, mba yaachichimieka Zambi. Hikaahangile ko nawa ase no jita, hanji kuya ni kwenyeka chifuchi chize te mwatwama mavungu ja Rubene ni Gade.

³⁴ Atu ja Rubene ni Gade yaamba ngwo: “Chilumbilo chino chili chinyingi kuli yetu eswe ngwo, Mwene Zambi, kali Zambi.” Mba yaachiluka jina ngwo: “Shindakenyo.”